Altyn valıýta rezervteri 35 mlrd AQSh dollaryn qurady - Erbolat Dosaev
NUR-SULTAN. QazAqparat – Jalpy halyqaralyq rezervter 91,9 mlrd AQSh dollaryn qurady. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
«Altyn valıýta rezervteri aıdyń basynan beri azdap tómendep, bıylǵy shildede 35 mlrd AQSh dollary boldy. Altyn portfeli negizinen altyn qunynyń aılyq ósýi nátıjesinde 960 mln AQSh dollaryna ósti. Erkin aıyrbastalatyn valıýtadaǵy aktıvter negizinen ekinshi deńgeıdegi bankterdiń korrespondenttik shottary men shetel valıýtasyndaǵy depozıtteriniń 655 mln AQSh dollaryna tómendeýi jáne 126 mln AQSh dollaryna memlekettik boryshty tóleý esebinen ózgerdi», - dedi E. Dosaev.
Onyń aıtýynsha, jalpy alǵanda, jalpy halyqaralyq rezervter bir aıda 500 mln AQSh dollaryna azaıyp, 91,9 mlrd AQSh dollaryn qurady.
Budan buryn habarlanǵandaı, Ulttyq qordyń aktıvteri bir aıda 450 mln AQSh dollaryna tómendep, bıylǵy jylǵy shildeniń sońynda 56,9 mlrd AQSh dollaryn qurady.
