Altyn ýntsııasy bir kúnde 100 dollarǵa arzandady
ASTANA. 2 naýryz. QazAqparat - 29 aqpandaǵy Nıý-Iorktegi taýar bırjasynda altynnyń baǵasy 100 dollardan astamǵa quldyrap, saýda qortyndysy boıynsha bir ýntsııasy 1688 dollar boldy, dep habarlaıdy Bı-Bı-Sı. Keıinirek Azııada baǵaly metall bir ýntsııasyna 1719 dollarǵa kóterildi.
Altyn baǵamynyń bulaısha shuǵyl tómendeýine AQSh Federaldyq rezervter júıesiniń tóraǵasy Ben Bernanktyń amerıkandyq ekonomıka daǵdarystan keıin qalpyna kele jatyr degen málimdemesi sebep boldy. Sondyqtan da kóptegen ınvestorlar baǵaly metaldy qoıa turyp, basqa táýekeldi aktıvterge umtyldy.
Altyn daǵdarys jaǵdaıynda ınvestorlar úshin «qaýipsiz aılaq» retinde qarastyrylady. 2008-2010 jyldardaǵy retsessııa barysynda ol edáýir ósip, ýntsııasy 700 dollardan 1900 dollarǵa deıin sekirdi.
Altyn qashan da joǵary baǵalanady, onyń bul jolǵy quldyraýy ýaqytsha jaǵdaı dep sanaıdy sarapshylar. 2009-2011 jyldary altyn baǵasynyń quny joǵary bolýy iri naryqtar - Qytaı men Úndistan tarapynan suranys kúshti bolýynan bolsa kerek. Bul elderdiń turǵyndary óz qarajattaryn altynmen nemese zergerlik buıymdarmen saqtaıdy. Osy eki eldiń ortalyq bankteri de altyndy jek kórmeıdi.
