«Altyn ýaqyt»: der kezinde kómek bere alamyz ba?»- BAQ-qa sholý
***
«Egemen Qazaqstan» gazetiniń jazýynsha, jylan jyly jaqsy jańalyqtarmen bastaldy. Kúni keshe ǵana Aqtóbe qalasynda «Batys-1» shaǵyn aýdanynda 600 oryndyq orta mektep paıdalanýǵa berilgen bolatyndy. Endi, mine, araǵa apta salyp oblys ortalyǵyǵynda taǵy bir jaǵymdy jańalyq boldy. Qaladaǵy «Batys-2» shaǵyn aýdanynda fızıka-matematıka baǵytyndaǵy Nazarbaev Zııatkerlik mektebi shákirtterge óz esigin aıqara ashty. Bul - Memleket basshysynyń bastamasymen ashylǵaly otyrǵan respýblıkamyzdaǵy onynshy Zııatkerlik mektep. Aqtóbe qalasyndaǵy fızıka-matematıka baǵytyndaǵy Nazarbaev Zııatkerlik mektebi 720 adamǵa arnalǵan, 120 oryndyq jataqhanasy bar. Mektep ǵımaratynda 59 kabınet, zerthanalar, pedagogıkalyq jáne aqparattyq tehnologııalardy ıntegratsııalaý ortalyǵy, jeke sabaq berý jáne psıhologııalyq beıimdeý kabınetteri, 360 oryndyq ashana, eki sport jáne akt zaly, qysqy baq ornalasqan. Maqala «Elbasy mektebi esigin aıqara ashty» degen taqyryppen berilip otyr.
«Qaı kezde de beıbitshiliksúıgish saıasatymen tanylyp kelgen Qazaqstan kezekti ret jahandyq mańyzy bar máseleni mámilege keltirýge muryndyq bolýda. Birden aıta ketý kerek, Irannyń ıadrolyq baǵdarlamasyn talqylaý eli retinde Qazaqstan kezdeısoq tańdap alynǵan joq. Bir jaǵynan ıadrolyq qarýdan bas tartýda kórsetken úlgisi men úrdisi bar, kelesi jaǵynan arandatýdan ada beıtarap baǵyt ustap otyrǵan Qazaqstanda basqosý qaı tarapqa bolmasyn tıimdi ekendigi basy ashyq jaıt»,-dep jazady «Egemen Qazaqstan". Aldyn ala málim bolǵanyndaı, bul kúnderi kelissózder barysyn kúlli álemge taratý úshin Qazaqstanda tirkelgen 100-ge tarta jýrnalıske qosa álemniń 200-ge tarta jetekshi BAQ ókilderi Almatyda turaqtaýda. Bul jaıynda «Araaǵaıyndyqta júrgen «altylyq» qıyn túıindi tarqatýǵa tyrysýda» atty maqalada aıtylǵan.
***
«Aıqyn» basylymynyń jazýynsha, Qazaqstan joldarynda ókinishke qaraı, jol-kólik oqıǵalarynyń sany jyldan-jylǵa artyp barady. Máselen, Bas prokýratýranyń quqyqtyq statıstıka jáne arnaıy esepke alý jónindegi komıtetiniń málimeti boıynsha, 2012 jyly 14 168 jol-kólik oqıǵasy tirkelgen eken. Bul kórsetkish 2011 jylmen salystyrǵanda, 15 paıyzǵa nemese 2149 derekke kóbeıgen. Osy apattar kezinde 3 myńnan asa adam ajal qushyp, 17488 adam jaraqat alǵan. Bul jyly aldyńǵy jylmen salystyrǵanda ajaly temir tulpardan bolǵan jandardyń sany taǵy da artqan...
«Osyndaı apatty jaǵdaıda jaraqat alǵan jandarǵa medıtsınalyq kómektiń der kezinde, ýaqytynda kórsetilgeni óte mańyzdy. Bul jerde kómekke kelgen jannyń kásibı biliktiligi ǵana emes, ýaqyt ta úlken ról oınaıdy. Qapylysta aýyr jaraqat alyp, ómir men ólim arasynda jatqan adamǵa alǵashqy 60 mınýtta kómek kórsetilse, onyń janyn arashalap qalýǵa múmkindik mol. Bul kezeń medıtsınada «altyn ýaqyt» (zolotoı chas) dep atalady»,-dep jazady gazet «Altyn ýaqyt»: der kezinde kómek bere alamyz ba?» atty maqalada.
Osy basylymda «Kelisimshart quny - 200 myń dollar» degen taqyryppen maqala berilgen. «Degenmen alǵashqy jańalyqty Reseıdiń «Kýban» ujymyna aýysqan jas talantymyz Baýyrjan Islamhannan bastasaq. Úsh jylǵa arnalǵan kelisimsharttyń quny 200 myń AQSh dollaryn quraǵany málim boldy. Bir qaraǵanda kóp soma emes. Alaıda klýb basshylyǵynyń túsindirýinen jaǵdaıdyń basqa qyryn kóremiz. Bul tusta qamqor kóńil aǵaıyn jas oıynshyny saýdaǵa salǵannan góri bolashaǵyn kúıttedi. Islamhanǵa usynys aıtqan ujymdardyń barlyǵy derlik bir jyldyq kelisimshartty qalaǵan. Árıne, olar uzaq merzimdi qalamaıdy, óıtkeni fýtbolshy úmitti aqtamasa bostan bosqa shyǵyndalamyz dep qaýiptenedi. Baýyrjan sııaqty jas túlekke bir jyl ýaqyt ashylyp oınaý úshin azdyq etýi de yqtımal. Osynyń bárin oı súzgiden ótkizgen «Taraz» klýbynyń basshylyǵy bizdiń pikirimizshe, óte durys sheshim qabyldady. Krasnodardyń «Kýban» ujymy Islamhannyń sheber oıynshy retinde qalyptasýyna barlyq jaǵdaıdy jasaýǵa ýáde berdi»,-dep jazady «Aıqyn».
***
«Kazahstanskaıa pravda» basylymynyń jazýynsha, Qazaqstan Prezıdenti Nursultan Nazarbaev Kýba Respýblıkasy Memlekettik Keńesiniń jáne Mınıstrler Keńesiniń tóraǵasy Raýl Kastroǵa quttyqtaý jedelhatyn joldady. Memleket basshysy Qazaqstan halqynyń jáne jeke óziniń atynan R.Kastrony Kýba Respýblıkasy Memlekettik Keńesiniń tóraǵasy laýazymyna qaıta saılanýymen quttyqtady. «Qazaqstan men Kýba arasynda ózara senim men ózara túsinistik negizinde qarqyndy damyp kele jatqan yntymaqtastyq halyqtarymyzdyń ıgiligi úshin aldaǵy ýaqytta da nyǵaıa túsetinine kámil senemin» delingen jedelhatta. Sonymen qatar, Qazaqstan Prezıdenti R.Kastroǵa jáne onyń otbasyna zor densaýlyq, asa jaýapty qyzmetine tabys, al dostas Kýba halqyna amandyq jáne ósip-órkendeý tiledi.
