«Altyn tulpar» báıgesiniń bas júldesi qaraǵandylyq shabandozdyń qanjyǵasyna baılandy
ASTANA. QazAqparat - Búgin Astana mańyndaǵy Qabanbaı batyr aýyly aýmaǵynda «Nur Otan» partııasynyń 15 jyldyǵy aıasynda uıymdastyrylǵan alaman báıgeden «Altyn tulpar» respýblıkalyq týrnıri aıaqtaldy.
Bas júldeni Qaraǵandy oblysynyń shabandozy Amangeldi Dýman jeńip aldy. Al ekinshi oryn shymkenttik Súleımen Qulovke buıyrsa, úshinshi oryn jáne bir qaraǵandylyq Erkebulan Ermaǵanbetovke berildi. Budan bólek, júldelerdiń bir parasy máre syzyǵyn kesken alǵashqy 9 tulparǵa da buıyrdy.
Toqtala keteıik, týrnırde Astana men Almaty qalalary jáne respýblıkamyzdyń 14 oblysynan elýge tarta báıge attary básekege túsken bolatyn. Jarysqa jylqynyń barlyq tuqymdary qatysyp, jasy 12-den asqan shabandozdar tulparlaryna qonyp, baqtary men baptaryn qatar synaǵan.
Týrnırdiń ashylýynda «Nur Otan» partııasynyń hatshysy Qumar Aqsaqalov elimizde táýelsizdiktiń alǵashqy kúnderinen beri Elbasy Nursultan Nazarbaevtyń tikeleı qamqorlyǵymen salamatty ómir saltyn qalyptastyrý men buqaralyq sportty, onyń ishinde, ulttyq sport túrlerin damytý baǵytynda júıeli jumystardyń jasalyp kele jatqanyn aıryqsha atap ótti.
Toqtala ketetin jaıt, partııa ulttyq sport oıyndaryna qatysty bastamalarǵa kómektesýge árdaıym daıyn ekenin de dáleldep keledi. Bul shara da saıası doktrınadaǵy ulttyq qundylyqtardy iske asyrýǵa baǵyttalǵan «Kókpar» men «Aýdaryspaq», «Asyq atý», «Qazaqstan Barysy» syndy partııa qoldaýymen ótkizilgen ulttyq saıystardyń zańdy jalǵasy.
Al báıgeni ótkizýdiń basty maqsaty - elimizdegi ulttyq at sportyna qyzyǵýshylyqty arttyryp, jastardy ulttyq qundylyqtardy qurmetteýge baýlý, ultjandylyqqa tárbıeleý, dástúrli alaman báıgeni kópshilik sportyna aınaldyrý. Sharany «Nur Otan» partııasynyń qoldaýymen QR Ulttyq sport túrleri qaýymdastyǵy, QR Mádenıet jáne sport mınıstrligi, bas demeýshisi «Samuryq-Qazyna» Ulttyq ál-aýqat qory uıymdastyrǵan bolatyn.
