«Altyn tulpar» alaman báıgesiniń joly 51 shaqyrymǵa deıin uzartyldy – B. Tileýhan
«Altyn tulpar» bul - aıryqsha báıge. Jasyratyny joq, búginde bolyp júrgen báıgelerge Eýropadaǵy atqoralarda turǵan, qysqa qashyqtyqqa shapshań, ushqyr shabatyn aǵylshynnyń taza qandy attary qatysady. Sonyń saldarynan naǵyz qazaqy attyń bapkerligi, jylqynyń uzaq shaqyrymǵa tózimdiligin daıyndaý óneri aǵylshyn attarynyń zamanaýı at shabystarynyń kóleńkesinde qalyp qoıyp jatqany ókinishti. Osyǵan baılanysty, qazaqtyń dástúrli atbegilik ónerin qalpyna keltirý maqsatynda byltyr alǵash ret atalǵan týrnır ótkizilgen bolatyn. Bıyl osy týrnır ekinshi ret ótkiziledi. Sonymen qatar, byltyrǵy báıge joly 43 shaqyrymnan 51 shaqyrymǵa uzartylyp otyr», - deıdi Bekbolat Tileýhan.
Onyń aıtýynsha, báıge jolyna qatysty áńgime byltyrǵy týrnıden beri az aıtylǵan emes. Máselen, ataqty Saǵynaıdyń asynda Qulager 43 shaqyrymǵa shapty delinedi. Bul da naqty málimet emes, óıtkeni bireýler muny 69-70 shaqyrym dep aıtady.
«Osy másele boıynsha atbegiler arasynda úlken keńes ótti. Sosyn byltyrǵy 43 shaqyrymda «jylqynyń tynysy durys ashylmaı qaldy» degen sekildi basqa da máselelerdi eskere kele, 51 shaqyrymǵa uzartýǵa toqtadyq», - dedi B.Tileýhan.
Aıta keteıik, «Altyn tulpar» alaman báıgesiniń júlde qory 23 mln teńgeni quraıdy. Sonyń ishinde, bas júldege 10 000 000 teńge berilse, márege alǵash jetken 9 tulparǵa jartylaı júlde beriledi. Sonymen qatar, osy shara aıasynda «at synshysy» baıqaýy uıymdastyrylyp, júırikti jazbaı tanyǵan synshyǵa «Tolybaı synshy», «Kúreńbaı synshy» jáne «Keıhaýys synshy» atyndaǵy arnaıy júldeler taǵaıyndalyp otyr.
Ekinshi respýblıkalyq týrnırge 14 oblys pen Astana jáne Almaty qalalarynyń árqaısysynan 10 sáıgúlikten, ıaǵnı, báıgege keminde 160 at qatysady dep kútiledi.
«Búgingi tańda alash balasy, tutas Qazaqstan bolyp erekshe toılap jatqan merekelerdiń biri - Qazaq handyǵynyń 550 jyldyǵy. Osy aıtýly merekege oraı «Nur Otan» partııasy, Ulttyq sport túrleri qaýymdastyǵy, Mádenıet jáne sport mınıstrligi «Altyn tulpar» respýblıkalyq týrnırin ótkizip, óz úlesin qosatyn bolady», - dedi B. Tileýhan.