«Altyn tulpar» alaman báıgesine qatysýǵa eń kóp ótinim Mańǵystaý óńirinen túsken
ASTANA. QazAqparat - Qyrkúıek aıynyń 6-sy kúni Astana qalasynyń mańyndaǵy Qabanbaı aýyly aýmaǵynda «Altyn tulpar» alaman báıgesi ótedi. Bul jarystyń maqsaty - el arasynda tanylmaı kele jatqan qazaqy júırik jylqylardy jaryqqa shyǵaryp, halqymyzdyń baıyrǵy dástúrli atbegelik ónerin jańǵyrtý bolyp tabylady, dep habarlaıdy Ulttyq sport túrleri qaýymdastyǵynan.
Qazir atalmysh jarysqa daıyndyq sharalary júrgizilýde. Dúbirli dodany uıymdastyrýshylardyń biri QR Ulttyq sport túrleri qaýymdastyǵynyń úılestirýshisi Albert Múrsálimovtiń aıtýynsha, bıylǵy báıgege qatysýǵa elimizdiń túkpir-túkpirinen ótinimder kelip túsip jatyr.
«Búginge deıin 68 úmitker tizimdeldi. Biraq barlyq qujattary tolyq ótinim - 48. Al qalǵan úmitkerler barlyq qujat-qaǵazdaryn tolyqtap búgin-erteń jiberemiz dep otyr. Jarysqa qatysýǵa nıet etkender oblystyq sport basqarmasynyń móri basylǵan, jarysqa qatysatyn júırik mal dárigerlik tekserýinen ótken qaǵazy jáne báıgege shabar shabandoz balanyń ata-anasynyń ruqsaty bolýy kerek. Bul qaǵazdar arnaıy notarıýs arqyly bekitilýi tıis. Osy qujattary talapqa saı bolǵan júırikter báıgege jiberiledi», - dedi A.Múrsálimov.
Byltyr jarysqa 77 at tirkelgen. Osylardan 49 júırik báıgege qosylǵan. Qalǵan 25 jylqynyń jarysqa qosylmaı qalǵan sebebi - qaǵaz-qujattary durys bolmaǵan.
Jarysqa qatysýǵa búgingi tańda Pavlodardan - 5, Qyzylordadan - 5, Astana qalasynan - 5, Jambyldan - 8, Mańǵystaýdan - 11, Aqtóbeden - 1, Qostanaıdan - 3, Qaraǵandydan - 6, Atyraýdan - 2, Shyǵys Qazaqstannan - 2 júırikten ótinim kelip túsken.
Jarys ár aınalymy 12,5 shaqyrymdy quraıtyn 4 aınalymdy quraıdy. 1.5 shaqyrym saıyn bir-birden 7 baqylaý beketi ornalasady. Ol baqylaý beketinde tóreshi, mal jáne adam dárigeri, tártip saqshylary jáne kamera turady. Budan basqa, 2 tikushaq jarys barysyn bıikten beınekameraǵa túsiredi.
Eske sala keteıik, bıylǵy «Altyn tulpar» alaman báıgesiniń júlde qory 23 mln teńgeni qurasa, bas júlde 10 mln. teńge dep josparlanyp otyr.
