«Altyn tulpar» alaman báıgesi ótedi
QR Ulttyq sport qaýymdastyǵy habarlaǵandaı, alaman báıge Qazaqstan Respýblıkasynyń Tuńǵysh Prezıdenti, Elbasy N.Nazarbaevtyń «Rýhanı jańǵyrý» baǵdarlamasy aıasynda «Nur-Otan» partııasynyń qoldaýymen, QR Ulttyq sport qaýymdastyǵy men Atyraý oblystyq ákimdiginiń birlese uıymdastyrýymen ótpek.
Aıta keteıik, «Altyn tulpar» báıgesi 2014 jyldan beri qaraı, tórt márte Nur-Sultan qalasy mańynda ótti. Qazaqy qoltýma júırik jylqylar tuqymynyń qalyptasýyna yqpal jasaý jáne uzaqqa shabatyn báıge attaryn baptaıtyn atbegilerdi yntalandyrý maqsatynda qolǵa alynǵan bul at jarysy qazirgi kezde Qazaqstannyń eń úzdik sáıgúlikteri qatysatyn, aıtýly atbegilerdiń asyǵa kútetin merekesine aınaldy.
«Altyn tulpar» respýblıkalyq týrnıriniń bas báıgesin 2014 jyly Qaraǵandy oblysynyń júırigi «Baqtory», 2015 jyly Jambyl oblysynyń tulpary «Camal», 2016 jyly Jetisý ólkesiniń júırigi «Jannur», 2017 jyly Jambyl oblysynyń tulpary «Samal» ekinshi márte utty.
Ótken jyly uıymdastyrýshylar alqasy «Altyn tulpar» báıgesin elorda tóńireginde ǵana emes, elimizdiń basqa óńirlerinde de ótkizgen jón dep sheshken bolatyn. Sondaı-aq, atalǵan jarysty jyl saıyn emes, eki jylda bir ret ótkizý týraly kelisimge kelgen.
Bıylǵy alaman báıgeniń resmı ataýy – «Altyn tulpar – Jaıyq jaǵasynda» V respýblıkalyq týrnıri. Qashyqtyǵy – 51 shaqyrym. Bas báıgesi – 10 mıllıon teńge. Jalpy júlde qory – 22 mıllıon teńge.
Naqtylap aıtar bolsaq, aldyńǵy kelgen toǵyz júırikke báıge bar. Alaman jarysqa júırik jylqy tuqymdarynyń barlyǵy jiberilip, elimizdiń 14 oblysy jáne Nur-Sultan, Almaty, Shymkent qalalarynyń árqaısysynan 5 sáıgúlikten qatysa alady. Ótinimder 11-qazanǵa deıin qabyldanady.
Sondaı-aq, 11-12 qazanda Atyraý qalasy kúnine oraı, Atyraý oblysy ákimdiginiń bastamasymen, Atyraý oblysy dene shynyqtyrý jáne sport basqarmasynyń, oblystyq «Ulttyq sport túrleri» federatsııasynyń uıymdastyrýymen, Mahambet aýdany Almaly aýylynda «Daraboz-2019» halyqaralyq týrnıri ótedi. Onda, kókpar, aýdaryspaq, qazaq kúresi, teńge ilý, jamby atý, alaman, top jáne qunan báıge, jorǵa jarysy, qumaı tazy jarystary syndy ulttyq sport túrlerinen jarystar ótedi. Bul týrnırge Qazaqstan jáne shetel komandalary qatysady. Jarystyń júlde qory – 32 180 000 teńge.
