«Altyn tulpar» alaman báıgesi 3 qyrkúıek kúni ótedi

ASTANA. QazAqparat -  3 qyrkúıek kúni «Nur Otan» partııasynyń qoldaýymen, «Samruk-kazyna trust» áleýmettik jobalardy damytý qorynyń demeýshiligimen, QR Ulttyq sport túrleri qaýymdastyǵynyń uıymdastyrýymen  «EXPO-2017» halyqaralyq kórmesi aıasynda  «Altyn tulpar» alaman báıgesi ótedi, dep habarlaıdy QazAqparat.

QR Ulttyq sport túrleri qaýymdastyǵynyń málimetine súıensek, osymen tórtinshi márte ótkeli otyrǵan «Altyn tulpar» alaman báıgesi úlken aýmaqty sheńberdi aınalyp shabý arqyly júrgiziledi. Ótken jyly bir aınalym 12.5 shaqyrym bolsa, bıyl ol qysqartylyp, ár aınalym 7 shaqyrymnan bolmaqshy. Báıge qashyqtyǵy - 51 shaqyrym.    Jarys jolynyń boıyna árbir 2 shaqyrym saıyn barlyǵy 7 baqylaý beketi ornalasady.

Beketterde telekameralar men tóreshiler, mal dárigerleri, tártip saqshylary turyp, báıge barysyn baqylaıdy. Jarysqa qatysatyn shabandozdarǵa túsi ártúrli arqasynda sandyq nómiri bar arnaıy fýtbolka men bas kıim kııý mindettelmek.

Bekettegi tóreshiler kóldeneńnen at qosylyp ketpeýin baqylaıtyn bolsa, kórermender men at ıeleri óz júırikteriniń qaı tusta shaýyp bara jatqandyǵyn «LED ekrannan» baqylaýǵa múmkindik qarastyrylǵan.

Alaman  jarysqa júırik jylqy tuqymdarynyń barlyǵy jiberilip, elimizdiń 14 oblysy jáne Astana, Almaty qalalarynyń árqaısysynan 10 sáıgúlikten qatysady. «Altyn tulpardyń» bas báıgesi - 10 mıllıon teńge. Aldyńǵy kelgen toǵyz júırikke báıge bar.