«Altyn tuǵyr»: Ulttyq sporttyń úzdikteri belgili boldy
2019 jylǵy ulttyq sporttyń respýblıkalyq, halyqaralyq básekesinde dara shyqqan jeńimpazdar osylaısha kóptiń qurmetine ıe bolyp otyr. Aýdaryspaq, teńge ilý, jamby atýdan, kókpardan Almatyda ótken Jastar arasyndaǵy І Azııa chempıonatynda, «Altyn jebe» І Álem chempıonatynda jeńimpaz atanǵan, báıge men qusbegilik básekelerinde top jarǵan jáne toǵyzqumalaqtan, asyq atýdan, qazaq kúresinen halyqaralyq jarystarda júldeli oryn ıelengen kóptegen sportshylar «Altyn tuǵyr» syılyǵyna laıyq dep tanyldy.
Atap aıtqanda, ulttyq sport túrleriniń úzdikter nomınatsııasy boıynsha «Úzdik mergender» retinde Aıkóz Eralhan men Babajan Baqdáýlet úzdik shyqsa, «Qoıanqasqa», «Úshqońyr», «Qyzjıren» - úzdik báıge attary atandy. «Úzdik aýdaryspaq balýandary» ataǵyna Amanjol Nurbek, Quralbaı Ermek, Imanǵazyuly Narmaǵanbet, Aǵabek Ǵabıt ıe boldy. «Úzdik qazaq kúresiniń balýany» nomınatsııasyn Narıman Tutqyshev, «Úzdik toǵyzqumalaq oıynshysy» nomınatsııasyn Ǵalymjan Temirbaev ıelendi. «Úzdik asyq atý komandasy» bolyp Nur-Sultan qalasynyń komandasy belgilendi. «Úzdik búrkitshi» - Serikbolsyn Jalǵasuly. «Úzdik teńge ilý sportshysy» - Ǵalymjan Іzjanov, «Úzdik kókpar komandasy» - kókpardan QR Jastar qurama komandasy, «Úzdik kókparshy» - Qurmanbek Turǵanbek, «Ulttyq at sportynyń úzdik tóreshisi» - Erlan Júsipov, «Úzdik jattyqtyrýshy» - Arslan Qabjanov, «Úzdik ulttyq sport klýby» - «Áýlıe ata» ulttyq sport klýby, «Jappaı kókpar úzdikteri» - Ǵalymjan Myrzabaev, Jomart Zııabek atandy. Sondaı-aq, Almaty oblysynyń ákimi Amandyq Batalov pen Ulttyq olımpıada komıtetiniń bas hatshysy Sáken Musaıbekovke «Elimjan» medali tabys etilip, uzaq jyldar osy salaǵa eńbek sińirgen kóptegen ardagerlerge qurmet kórsetildi.
Aıta ketsek, «Altyn tuǵyr» - jastarymyzdy erlikke, batyldyqqa, eptilikke, ójettikke, júrektilikke tárbıeleıtin, rýhyn shyńdaıtyn ulttyq sporttyń dástúrli jıyny. «Altyn tuǵyr» ulttyq sport básekelerinde el namysyn asqaqtatyp júrgen azamattarymyzdyń esimin ardaqtaıdy.
