«Altyn Tobylǵy» ádebıet baıqaýy jas daryndardy shaqyrady
ASTANA. QazAqparat - Qazaqstan Respýblıkasy Tuńǵysh Prezıdenti - Elbasy qory bıyl úshinshi ret uıymdastyrylǵan dástúrli «Altyn Tobylǵy» ádebıet baıqaýyna ótinimderdi qabyldaý júrip jatqandyǵyn habarlady.
Baıqaýdyń negizgi maqsaty - ulttyq ádebıette jańa esimderdi qalyptastyrý jáne jas qalamgerlerdiń ómirlik fılosofııasyn kórsetetin qazirgi zamanǵy ádebıetke qoǵamnyń qyzyǵýshylyǵyn arttyrý bolyp tabylady. Syıaqynyń jalpy qory - 5,5 mıllıon teńge.
Baıqaýǵa elimizdiń 18-35 jas aralyǵyndaǵy jas daryndar qatysa alady jáne budan buryn esh jerde jarııalanbaǵan týyndylar ǵana qabyldanady.
«Altyn Tobylǵy» syılyǵy «Úzdik proza», «Úzdik poezııa», «Úzdik dramatýrgııa», «Úzdik balalarǵa arnalǵan shyǵarma» sııaqty tórt nomınatsııa boıynsha taǵaıyndalǵan. Árbir nomınatsııanyń jeńimpazyna 1 mıllıon teńge syıaqy beriledi. Sonymen qatar, bıylǵy jyly QR Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy maqsattardy júzege asyrýǵa arnalǵan arnaıy taqyryptyq nomınatsııa jarııalandy. Bul «Týǵan el» nomınatsııasy boıynsha syıaqy 1,5 mıllıon teńge kóleminde belgilendi.
Shyǵarmalardy elimizdiń tanymal mádenıet qaıratkerleri, aqyn-jazýshylar men jýrnalısterinen quralǵan Qazylar alqasy saraptaıtyn bolady.
Ótinimder 2017 jylǵy 1 shilde men 1 qarasha aralyǵynda qabyldanady. Jeńimpazdar esimi jyl sońynda jarııalanady. 
