«Altyn tobylǵy» ádebı baıqaýynyń jeńimpazdary anyqtaldy

NUR-SULTAN. QazAqparat - Nursultan Nazarbaev Qory «Altyn tobylǵy» ádebı baıqaýyn qorytyndylady, dep habarlaıdy QazAqparat.

Meıirimdi oıatar áserli oqıǵa, qyzyqty jaıt, júrek tebirenter hıkaıa, jalyndy óleńder. «Altyn tobylǵy» ádebı baıqaýyna qatysqan jas aqyn-jazýshylardyń shyǵarmalaryn osylaı sıpattaýǵa bolady.

Baıqaýǵa Nursultan Nazarbaev Qory muryndyq bolǵan, bul bıyl altynshy ret ótti. Joba jyl saıyn shyǵarmashyl jastardyń nazaryn aýdaryp, qalamynyń ushtalýyna shabyt berip keledi.

Pandemııaǵa baılanysty bıyl baıqaý jeńimpazdary onlaın túrde jarııalandy. Nursultan Nazarbaev Qorynyń atqarýshy dırektory Qanat Jumabaev is-sharanyń ashylý saltanatynda: «Altyn tobylǵy» – jyl sanap tanymal bolyp kele jatqan jobanyń biri. 2015 jyly baıqaýǵa 120 shyǵarma qatyssa, bıyl Qazaqstannyń túkpir-túkpirinen 161 týyndy baq synady. Ár avtorǵa baıqaýǵa qyzyǵýshylyq tanytqany úshin, erekshe shyǵarmalary úshin alǵys aıtamyz», - dedi.

Baıqaý jeńimpazdary:

- «Jyldyń úzdik poezııasy» nomınatsııasynda – Jánibek Álımanov, Qaraǵandy qalasy («Dala jyrlary» shyǵarmasy);

- «Jyldyń úzdik prozasy» - Túrkistan qalasynan kelgen Baqytbek Hadyr («Májýsıler»);

- «Jyldyń úzdik balalar shyǵarmasy» - Esemanov Hamıt, Taraz qalasy («Kúnnen kelgen Batyr»);

- «Jyldyń úzdik dramatýrgııasy» - Almaty oblysynan kelgen Murat Qolǵanat («Kýáger»).

Bul jeńimpazdardyń árqaısysy 2 mıllıon teńgeden aldy.

Qazylar alqasynyń músheleri «Abaıdyń 175 jyldyǵyna arnalǵan shyǵarmalar» arnaıy syılyǵynyń jeńimpazyn anyqtaý barysynda syılyqty eki avtorǵa taǵaıyndaýdy jón dep tapty. Olar – Almaty qalasynan Ýmtyl Zaqan («Shyńǵystaý Minjat. Hakim» shyǵarmasy) jáne Baǵashar Tursynbaıuly («Jas Abaı») Árqaısysy 1,5 mıllıon teńge kólemindegi syıaqy aldy.

«Altyn tobylǵy» baıqaý jeńimpazdaryn anyqtaý saltanatyn bizdiń YouTube arnasynan kórýge bolady. Silteme profılde kórsetilgen.