«Altyn taǵa» bazarynda sapaly ári ekologııalyq taza ónim satylady - Aqmola oblysy
KÓKShETAÝ. QazAqparat - Aqmola oblysynyń Tselınograd aýdanynda azyq-túlik, turmystyq zattar jáne mal satylatyn ámbebap «Altyn taǵa» bazarynan Oraza aıy kezinde sapaly ári ekologııalyq taza ónim satyp alýǵa bolady, dep habarlaıdy «QazAqparat» HAA tilshisi oblystyq ishki saıasat basqarmasynyń baspasóz qyzmetine silteme jasap.
Astananyń irgesindegi Qosshy aýylynyń mańynda ornalasqan «Altyn taǵa» saýda kesheniniń aýmaǵy 1 650 sharshy metrdi quraıdy. Onda tek saýda pavılondary ǵana emes, veterınarlyq zerthana, qasaphana, shujyq tsehy, tońazytqysh kamerasy, kókónis jáne jemis-jıdek qoımasy bar. Oǵan qosa, 2500 qoı-eshki, 300 bas iri qara men jylqy túligin qamap ustaıtyn 15 ashyq mal qorasy da qarastyrylǵan.
Saýda kesheniniń ókilderiniń aıtýynsha, mundaı bazar elimizde tek Jambyl oblysynyń Qordaı kentinde ǵana bar. «Altyn taǵa» bazarynda kókónis, jemis-jıdek, et jáne et ónimderi, balyq, sút jáne sút ónimderi, arpa, turmystyq hımııa jáne kúndelikti tutynatyn taýarlar satylady.
Shujyq tsehynda et ónimderiniń súrlengen, jartylaı súrlengen tárizdi 50 túri shyǵarylady. Tsehtyń qýaty táýligine 2 tonna et ónimderin quraıdy. Sondaı-aq, kókónis jáne jemis-jıdek qoımasynda 1 000 tonn ónim saqtaýǵa bolady. Qoımanyń ishi salqyndatqysh, belgili bir aýa temperatýrasyn ustap turý úshin qajetti qondyrǵylarmen jabdyqtalǵan.
Oǵan qosa, saýda ornynda syrttan kelgen saýdagerler úshin jataqhana, 100 oryndyq ashana jáne 200 kólikke arnalǵan avtoturaq qarastyrylǵan. «Altyn taǵa» bazary tas joldyń boıynda ornalasqandyqtan ári beınebaqylaý kamerasymen jabdyqtalǵandyqtan aýyl shaýashylyǵy taýarlaryn ónidirýshiler úshin óte qolaıly. Osy saýda orny arqyly elorda turǵyndary men astanalyq eldi mekenderdegi halyq sapaly ári ekologııalyq taza aýyl sharýashylyǵy ónimderin tutynýda.
