«Altyn Samǵaý» ulttyq sport syılyǵyna daýys berý bastaldy
NUR-SULTAN. QazAqparat – Qazaqstandyqtar «Altyn Samǵaý-2019» ulttyq sport syılyǵyna úmitkerler úshin daýys berip jatyr, dep habarlaıdy QazAqparat UOK saıtyna silteme jasap.
Qazaqstannyń Ulttyq Olımpıadalyq komıtetiniń aqparatyna sáıkes, daýys berý komıtet saıtynda 29 qarashaǵa deıin júrgiziledi. Qazaqstandyqtar 9 nomınatsııa boıynsha úzdikterdi tańdaı alady: «Jazǵy sport túrleri boıynsha úzdik sportshy»; «Qysqy sport túrleri boıynsha úzdik sportshy»; «Úzdik jas sportshy»; «Jazǵy sport túrleri boıynsha úzdik jattyqtyrýshy»; «Qysqy sport túrleri boıynsha úzdik jattyqtyrýshy»; «Olımpıadalyq sport túrleri boıynsha úzdik ulttyq sport federatsııasy»; «Úzdik sporttyq aımaq» (oblys jáne respýblıkalyq deńgeıdegi qalalar sondaı-aq, elordadaǵy dene shynyqtyrý jáne sport basqarmasy); «Jyl jańalyǵy» jáne «Jyldyń úzdik komandasy».
Úmitkerler tizimi olımpıadalyq sport túrleri maýsymynyń qorytyndysy boıynsha jasaldy.
Aıta keteıik, bıyl sondaı-aq parasportshylarǵa «Ǵylymı-keshendi toptyń úzdik mamany» arnaıy nomınatsııasy tapsyrylatyn bolady.
QR Ulttyq Olımpıadalyq komıtetiniń prezıdenti Tımýr Qulybaevtyń bastamasymen bekitilgen sport syılyǵyn tabystaý sharasy aldaǵy 30 qarasha kúni elordadaǵy «Qazaqstan» ortalyq kontsert zalynda ótedi.
Saltanatty kesh elimizge tanymal juldyzdardyń qatysýymen ótedi. Atap aıtar bolsaq, «Ninety One» toby, NaZıma, Moldanazar, Say Mo, Qýandyq Rahym jáne ózge de ánshiler óner kórsetedi.
