«Altyn Samǵaý-2019» ulttyq sporttyq júldesine bıletter satyla bastady
NUR-SULTAN. QazAqparat - Qazaqstan Ulttyq Olımpıadalyq komıteti dástúr boıynsha jyldy ulttyq sporttyq júldemen qorytyndylaǵaly otyr, dep habarlaıdy QazAqparat UOK baspasóz qyzmetine silteme jasap.
Qazaqstan UOK jankúıerlerge jyldyń eń mańyzdy júldesine qatysty birneshe tosynsyı daıyndady. Bıyl birinshi ret #teamKZ-tiń adal jankúıerleri Sporttyq júldege qatysýǵa, qurama múshesi atanýǵa, súıikti sportshylarymen qaýyshýǵa múmkindik alady. Jankúıerler 2019 jylǵy Qazaqstan sportynyń basty jetistikteriniń avtory atanǵan úzdik sportshylardy, jattyqtyrýshylar men qurama komandalardyń saltanatty marapattaý sharasyna kýá bolady. Marapattaý rásimi «Ninety One», NaZıma, «Moldanazar» toby, Qýandyq Rahym jáne basqa da otandyq estarada juldyzdarynyń qatysýymen ótedi. Búgin www.ticketon.kz saıtynda bıletter satylymǵa tústi. «Bıyl Qazaqstan UOK óz jankúıerleri úshin kóptegen tosynsyılar daıyndap jatyr. Biz júldeniń dástúrli «atrıbýttaryn» - sportshylardyń «qyzyl kilemin», daýys berý men marapattaý rásimin qaldyrdyq. Endi jankúıerler ony teledıdardan kórip qana qoımaı, sonymen qatar eldiń basty sporttyq marapatyna atsalysa alady. Elimizdiń tanymal juldyzdarynyń qatysýymen ótetin kontserttik baǵdarlama da erekshe bolmaq. Tosynsyıǵa toly sharany kózben kórgen jaqsy. Biz elordanyń barlyq turǵyndary men qonaqtaryn, bizdiń #teamKZ-tiń barlyq jankúıerlerin kútemiz«, - dep atap ótti elimizdiń UOK baspasóz qyzmeti. Úzdik sportshylardy anyqtaý formaty ózgerissiz, ádettegideı, Qazaqstan Ulttyq Olımpıadalyq komıtetiniń www.olympic.kz resmı saıtynda daýys berý arqyly anyqtalady.
15 qarashadan bastap UOK resmı saıtynda barlyq úmitkerlerdiń 2019 jylǵy jetistikteri kórsetilgen tolyq aqparat usynylady.
Eske sala keteıik, «Altyn Samǵaý-2019» sporttyq júldede paralımpıadalyq sport túrleriniń ókilderi de qatysady. Saltanatty shara 30 qarasha kúni saǵat 18:00-de «Qazaqstan» ortalyq kontsert zalynda ótedi. 2019 jylǵy Ulttyq Sporttyq júldeniń bas aqparattyq seriktesi «Habar» arnasy.