Altyn Orda dáýirine jatatyn «Qyzyl oba» eskertkishi kıeli oryndar tizimine engizilmek
Soltústik Qazaqstan oblysynyń aýmaǵynda 436 arheologııalyq eskertkish tirkelgen. Tabıǵı-mádenı murany qorǵaý jáne paıdalaný ortalyǵynyń málimetinshe, onyń 47-si — tas ǵasyryna, 167-si — qola dáýirine, 203-i — erte temir dáýirine, 19-y – orta ǵasyrǵa jatady.
«Arheologııalyq eskertkishterdiń basym bóligi Ǵabıt Músirepov, Aqjar jáne Taıynsha aýdandarynda shoǵyrlanǵan. Bul eskertkishterdiń barlyǵynyń derlik belgili bir tarıhı jáne kórkemdik quny bar. Kópshiligi jergilikti mańyzdaǵy nysandar qatarynda bolsa, Aıyrtaý aýdanyndaǵy Botaı qonysynyń respýblıkalyq mańyzdaǵy eskertkish mártebesi bar», - deıdi SQO Tabıǵı-mádenı murany qorǵaý jáne paıdalaný ortalyǵynyń dırektory Raqat Mámbetalınov.
Byltyr arheologııalyq eskertkishterdiń qatary Ýálıhanov aýdany Sileti ózeniniń mańynda tabylǵan «Qyzyl oba» mavzoleı-qorymymen tolyqty.
XIV-XVI ǵasyrlarǵa jatatyn eskertkish jyl jańalyǵy boldy.
«Ǵalymdardyń pikirinshe, qorym Altyn Orda dáýirine tıesili. Ol jerde Joshy han kezindegi jáne odan keıingi handar men tóreler urpaqtary jerlengen. 1200 sharshy metrdi alyp jatqan qorymda bıleýshilerdiń jatandǵy kóptegen aıǵaqtarmen dáleldendi. Jańa tarıhı eskertkishtiń tabylýy tarıhtyń aqtańdaq betterin ashýǵa septigin tıgizbek. Endi osy qundy eskertkishti Qazaqstannyń kıeli oryndary kartasyna engizý jaıynda usynystar túsip jatyr», - deıdi Raqat Mámbetalınov.
Qazir SQO kıeli jerler kartasyna 33 nysan kirgen. Óńirde arnaıy jumys toby qurylǵan. Olar «Rýhanı qazyna» baǵdarlamasy aıasynda «Qazaqstan geografııasynyń sakraldy kartasyna» SQO-nyń tabıǵı nysandaryn engizý boıynsha jumys istep jatyr. Jumys tobynyń otyrysy naýryz aıynyń sońyna josparlanǵan. Byltyr kıeli jerler kartasyna óńirdiń halyq arasynda asa tanymal emdik qasıeti mol tuzdy kólderi men birneshe tabıǵı keshenderi engen edi.
