Altyn Orda bazarynyń ıesi ákimshilik jaýapqa tartyldy

ALMATY. QazAqparat - «Altyn Orda» bazarynyń ıesi ákimshilik jaýapqa tartyldy. Sot sheshimimen kompanııaǵa 1,5 mln teńgege jýyq aıyppul salyndy. Bul týraly Básekelestikti qorǵaý jáne damytý agenttigi málim etti, dep habarlaıdy QazAqparat tilshisi.

«Almaty oblysy Qarasaı ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen «Altyn Orda QazTrade LTD» JShS ákimshilik jaýpkershilikke tartylyp, Ákimshilik quqyq buzýshylyq týraly Kodkestiń 159 babynyń 3 bóligine sáıkes, monopolııalyq joǵary baǵany qoldaný kezinde alynǵan monopolııalyq kiris 46 976 550 tenge kóleminde tárkilene otyryp, 1 424 776 tenge kóleminde aıyppul salyndy»,- delingen habarlamada.

Agenttik taratqan málimetke qaraǵanda, buǵan deıin Almaty oblysy boıynsha monopolııaǵa qarsy departament «Altyn Orda QazTrade LTD» JShS-ne qatysty ákimshilik is qozǵap, materıaldardy qaraý úshin Almaty oblysynyń Qarasaı mamandandyrylǵan aýdanaralyq sotyna jibergen.

«Atap aıtqanda, 2022 jylǵy naýryzda «Altyn Orda» bazaryn tekserý qorytyndylary boıynsha seriktestik qyzmetinde saýda oryndaryn kúndelikti jalǵa berýde monopolııalyq joǵary baǵasyn belgileýden jáne ustap turýdan kórinetin ústeme nemese monopolııalyq jaǵdaıdy teris paıdalaný faktileri anyqtalǵan», - dep habarlady vedomstvodan.

Qarasaı mamandandyrylǵan aýdanaralyq sotynyń qaýlysy zańdy kúshine engen joq.