«Altyn Orda» bazaryndaǵy janjal: qylmystyq is toqtatyldy
TALDYQORǴAN. QazAqparat – Almaty irgesindegi «Altyn Orda» bazarynda janjaldasqan kólik júrgizýshi men avtoturaq qyzmetkeri tatýlasyp, qylmystyq is toqtatyldy, dep habarlaıdy QazAqparat tilshisi.
«Altyn Orda» bazarynda janjaldasqandar tatýlasyp, qylmystyq is toqtatyldy. Qos tarap óz kinálaryn moıyndap, bir-birlerinen keshirim surady jáne istiń toqtatylýyn ótindi», - delingen Almaty oblystyq Polıtsııa departamenti baspasóz qyzmetiniń resmı málimdemesinde.
Esterińizge sala keteıik, 30 naýryzdaǵy eki azamat arasyndaǵy janjal avtoturaq aqysyna qatysty shyqqan. Qaltasynda 100 teńgeniń joqtyǵyn aıtqan kólik júrgizýshisi 20 myń teńge bere alatynyn bolmasa tólemdi bank kartasyna aqsha aýdarý arqyly jasaı alatynyn jetkizedi. Biraq avtoturaq qyzmetkeri aýdarymdy qabyldaı almaıtynyn aıtyp, kólik ıesiniń avtoturaqtan shyǵýyn ótinedi. Osy sátte turaq qyzmetkeriniń sóıleý máneri unamaǵan júrgizýshi kólikten túsedi. Ary qaraı sózge kelispeı qalǵan azamattar arasynda janjal týyndaıdy. Jazbaǵa kólik qojaıynyna qyzmetkerdiń pyshaq ala júgirgen sáti men júrgizýshiniń avtoturaqta jumys isteıtin azamatty jaǵasynan alyp, basymen urǵan kezi túsip qalǵan. Artynsha bazarǵa kelgen adam kóligine otyryp, oqıǵa ornynan ketýge árekettenedi. Osy sátte bazardaǵylar kóliktiń ketýine kedergi jasaýǵa tyrysady. Іstiń nasyrǵa shapqany sonsha osy kıkiljińge qatysty qylmystyq is qozǵaldy.
«Buzaqylyq» baby boıynsha qozǵalǵan is qos taraptyń tatýlasýyna baılanysty toqtatyldy.
