«Altyn orda» bazary janyndaǵy joldy jóndeý jumystary 95%-ǵa aıaqtaldy
ALMATY. QazAqparat – «Altyn orda» bazary mańyndaǵy Almaty-Bishkek ýchaskesinde joldy keńeıtý boıynsha kúrdeli jóndeý jumystary 95%-ǵa aıaqtaldy. Bul týraly QazAvtoJol Basqarma tóraǵasy Meıirhat Qasymbaev aıtty, dep habarlaıdy QazAqparat tilshisi.
«Qazirgi ýaqytta «Altyn Orda» jobasy 95%-ǵa aıaqtaldy. Negizgi baǵyttar boıynsha barlyq jumystar oryndaldy. Jol 8-den 10 jolaqqa deıin keńeıtildi. Sonymen qatar, basty magıstraldyq estakadanyń, «taǵa» túrindegi burylý estakadasynyń jáne de Aqsaı ózeni arqyly ótetin kópirdiń qurylysy aıaqtaldy. Jol boıynda jaryq shamdary ornatyldy. Jaıaý júrginshilerdiń qaýipsizdigin qamtamasyz etý úshin úsh jaıaý júrginshiler ótkeli salyndy. Merdiger uıym qıyrshyq tas mastıkalyq asfaltobeton jabynynyń joǵarǵy qabatyn tóseý jumystaryn aıaqtap, qorshaýlar men jol belgilerin ornatyp, jol tańbalaryn syzýda», - dedi Meıirhat Qasymbaev.
Eske salsaq, buǵan deıin Altyn Orda bazary janyndaǵy jol jóndeý jumystarynyń 85 paıyzy aıaqtalǵan bolatyn.
