Altyn medalǵa qol jetkizýge sál ǵana ýaqyt jetpeı qaldy - B. Bekbolatuly
ALMATY. QazAqparat- Almatyda ınformatıka páninen mektep oqýshylary arasynda XXVII halyqaralyq Olımpıada óz máresine jetti. Qazaqstandyq tórt oqýshynyń úsh kúmis, bir qola medalǵa qol jetkizgenderi belgili.
Solardyń biri, bıyl Aqtaý qalasyndaǵy Qazaq-túrik lıtseıin támamdaǵan, 18 jastaǵy Bekjan Bekbolatuly «QazAqparat» tilshisine bergen suhbatynda altyn medalǵa qol jetkizýge azǵana ǵana ýaqyt jetpeı qalǵanyn aıtty.
«Ókinishke oraı, azǵana ǵana ýaqyt jetpeı qaldy. Óıtkeni, tapsyrmalardy oryndaý barysynda bolmaıtyn jerden, kishigirim qatelikter jiberip aldym. Solardy túzeımin dep kóp ýaqytym ketti. Taǵy 25-30 mınýt bolǵanda altynǵa qol jetkizer edim. Al tapsyrmalar kúrdeli boldy. Kóbinese logıkaǵa negizdelgen», - dedi B. Bekbolatuly.
Sonymen qatar ol, bul olımpıadaǵa bes jyl boıy daıyndalǵandyǵyn jetkizdi.
«Lıtseıde jetinshi synypta ár túrli pánderden emtıhan tapsyrdyq. Sonda ár pánniń muǵalimderi sol emtıhandardyń nátıjeleri boıynsha ózderine oqýshylar tańdap, olardy olımpıadalarǵa daıyndaı bastady. Men ınformatıkaǵa tústim. Keıin esep shyǵaryp júrgende bul pán maǵan qatty unady. Sol kezde Almatyda 2015 jyly ıformatıkadan Halyqaralyq olımpıadanyń bolatyndyǵyn estidim. Sodan bastap daıyndaldym. Mine, kúmis medal enshiledim. Endi ýnıversıtetke túsip, stýdenttik olımpıadalarda odan da joǵary nátıjege qol jetkizip, elimizdiń namysyn qorǵaǵym keledi», - dedi B. Bekbolatuly.
Aıta ketelik, olımpıada eki týrdan turdy. Ár týrda oqýshylar bes saǵattyń ishinde úsh tapsyrmadan oryndady.
