Altyn quımalar Almaty, Atyraý jáne elordada kóp satylady
«Satylymnyń ulǵaıýyna halyqtyń altynǵa ınvestıtsııa quıýǵa qyzyǵýshylyǵy artqany yqpal etip otyr. Sebebi, qarjy naryǵyndaǵy belgisizdik pen valıýta baǵamy qubylmaly bolyp turǵan shaqta kópshilik buǵan jınaqtarynyń saqtalýyn qamtamasyz etýdiń balamaly quraly retinde qaraıdy»
delingen QUB aqparattyq habarlamasynda.
Halyqqa tazartylǵan altyn quımalardy satý jáne satyp alý baǵdarlamasyn Ulttyq bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 3 tonnaǵa jýyq 87531 altyn quıma satyldy.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq quıma. Jalpy, satylǵan quımalar arasynda osy 10 gramdyq quımanyń úlesi – 27% nemese 23390 dana. Odan keıin 20 gramdyq quıma suranysqa ıe - 18178 dana (21%). Al, 100 gramdyq quımadan 18034 dana (20%), 5 gramdyq quımadan 16834 dana (19%), 50 gramdyq quımadan 11095 dana (13%) satyldy. Ulttyq bank málimetinshe, Altyn quımalar Almaty, Nur-Sultan jáne Atyraý qalalarynda kóp satylady.
«Altyn quımalar - senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnktteri klıentke aqshany sol kúni tóleı otyryp, altyn quımalardy keri satyp ala alady»
, - dep jazylǵan habarlamada.
Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 303,3 keli 12367 altyn quımany keri satyp alǵan, bul – jalpy satylǵan altyn quımalardyń 14%-y. Olar keri satyp alǵan altyn quımalardyń barlyǵy Ulttyq Banktiń fılıaldary arqyly halyqqa satylady.
«Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorappen shyǵarylady, sol arqyly quımanyń ashylǵan-ashylmaǵanyn ońaı tekserýge bolady. Qorǵanysh qoraby - sapa sertıfıkaty bolyp sanalady. Sondyqtan, altyn quımany uqyppen saqtap, qorabyn búldirmeýge keńes beremiz»
, - deıdi QUB ókilderi.
Aıta keteıik, altyn quımalardy Halyk Bank, Eýrazııalyq Bank, Jusan Bank, TsentrKredıt Banki, sondaı-aq jekelegen banktik emes pýnkterden satyp alyp, keri satýǵa bolady.
Eske salsaq, QUB ishki naryqta qolma-qol shetel valıýtasy jetkilikti ekenin málimdegen bolatyn.
Sondaı-aq, QUB tóraǵasynyń orynbasary Vıtalıı Týtýshkın Parlamentte respýblıkalyq bıýdjetti talqylaý kezinde teńgeniń aıyrbas baǵamynyń kúrt aýytqýyn shekteý sharalary júrgizilip jatqanyn aıtty.
Ol sonymen birge, bıyl Qazaqstan úshin syrtqy ınflıatsııalyq jaǵdaı anaǵurlym kúrdeli bolatynyn da jetkizdi.
Qazaqstan Ulttyq banki alaıaqtardyń kóbeıgenin de eskertti.
