«Altyn qursaqty analar sanyn aqshamen de arttyra almadyq» - respýblıkalyq basylymdarǵa sholý
***
«Egemen Qazaqstan» basylymynyń jazýynsha, shildeniń 1-i kúni Kıevte oınalǵan Eýropa chempıonatynyń fınalynda Ispanııa quramasy Italııa komandasyn 4:0 etip utyp, Eýropa chempıony atandy. Eger osylardyń arasynda, 2010 jyly «qyzyl fýrııanyń» álem chempıonatyn da jeńip alǵanyn eske alar bolsaq, bul onyń sońǵy tórt jyldyń ishindegi úshinshi tolaǵaı tabysy bolyp tabylady. Eýropa qarsylastardyń biri aıqyn basymdylyq tanytqan mundaı fınaldy kópten beri kórgen joq. Másele ıspandardyń chempıonat bastalǵaly beri birinshi ret osyndaı joıqyn oıynnyń jortýylyna jalyn qosqanynda ǵana emes. Olar óz elderindegi «Barselonanyń» eń bir keremet babynda turǵan kezinde usyna alatyn barynsha úzdik oıyndarynyń úlgisin kórsetti. Sardar Vısente del Boskeniń sarbazdary úshin bul kúni alań ústinde artyq aýys dop beris, bosqa júgiris, tipti bolmaǵan esepti. Olar bárin óte dál, meılinshe naqty, qoldan kelgeninshe taza istedi. Uıymdastyrǵan kombınatsııalarynyń ózi birinen biri asyp tústi. Osy aıtýly doda jaıynda basylymnyń búgingi sanynda «Qurlyqtyń myqtysy - Ispanııa» atty taqyryppen basyldy.
Sondaı-aq osy basylymnyń jazýynsha, keshe Qazaqstan Respýblıkasynyń Prezıdenti Nursultan Nazarbaev óziniń shaqyrýymen Astanaǵa memlekettik saparmen kelgen Makedonııa Respýblıkasynyń Prezıdenti George Ivanovpen kezdesti. Elbasy alǵashqy sapar jasap otyrǵan mártebeli meımandy zaıybymen birge Aqordada qalyptasqan dástúrge saı saltanatty jaǵdaıda qarsy aldy. Saltanatty qarsy alý rásiminen keıin Makedonııa basshysy bastaǵan delegatsııamen shaǵyn quramda kelissózder bolyp ótti. Artynan taraptar keńeıtilgen quramda kezdesip, tańǵy as barysynda kelissózder jalǵasyn tapty. Onyń negizgi denin saýda-ekonomıkalyq baılanystar máselesi qamtydy. Sondaı-aq eki el arasyndaǵy saıası máseleler, sonyń ishinde ekijaqty yntymaqtastyqqa kedergi bolyp otyrǵan tustar talqylaý taqyrybyna aınaldy. Áıtse de taraptar ózderiniń yntymaqtastyqqa beıildi ekendikterin tanytty. Atalmysh mańyzdy kelissózder barysyndaǵy máseleler jaıynda «Egemen Qazaqstan» basylymynyń búgingi sanyndaǵy «Yntymaqtastyqqa múmkindik mol» atty maqalada basyldy.
***
Bıylǵy jyldyń basynda álem turǵyndarynyń sany 7 mıllıardqa jetti. Biraq olardyń bári tolyq toıyp tamaq ishpeıdi. BUU málimetteri boıynsha 1 mıllıard adam nemese búkil dúnıejúzi halqynyń 15 paıyzy asharshylyq jaǵdaıynda ómir súrip jatyr. Bul derek qazir adamzat aldyndaǵy asa úlken másele - azyq-túlik ónimderin óndirýdi molaıtý ekenin kórsetedi. Al aýmaǵy jaǵynan álemdegi on úlken eldiń qataryna kiretin Qazaqstan - eń aldymen agrarly memleket. Azyq-túlik qaýipsizdigi jaıynda jáne aýyl sharýashylyǵy ónimderi salasyndaǵy máseleler týraly «Aıqyn» basylymynyń búgingi sanyndaǵy «Ónimdilik óz-ózinen óspeıdi» atty maqalada jazylǵan.
***
«Alash aınasy» basylymynyń búgingi sanynda «Altyn qursaqty analar sanyn aqshamen de arttyra almadyq» atty maqala jarııalandy. Basylymnyń jazýynsha, búginde álemniń kóptegen elinde, onyń ishinde Qazaqstanda bala týý kórsetkishin kóterý máselesi zor mańyzǵa ıe bolyp otyr. Urpaq jańarmasa, myńjyldyq tarıhy bar elder túbinde joıylyp tynary belgili. Tyǵyryqtan shyǵýdyń árqıly alǵysharttary jasalýda. Mysaly, keıbir batys elderiniń tájirıbesin negizge ala otyryp, dúnıe esigin ashqan árbir balaǵa bankten esepshot ashyp, soǵan aqsha salý usynylýda. Bul tájirıbeni elimiz boıynsha týý deńgeıi eń tómen Soltústik Qazaqstan oblysy eki jyl buryn júzege asyrýǵa kirisip te ketti. Biraq mıllıondaǵan qarjy bólingenimen, bul aımaqta demografııalyq dúmpý baıqalmaı tur.
Osy basylym betinde jarııalanǵan «Qarapaıym jumysshynyń qaýipsizdigi qashan eskeriledi?» atty maqalada jumysshylar quqy turǵysyndaǵy másele kóterilip otyr. «Sońǵy jyldary jumys oryndarynda jaraqat alý, qaıǵyly jaǵdaıǵa dýshar bolý faktileriniń jıilep ketýi kimdi bolsa da alańdatpaı qoımas. Óıtkeni mundaı jaǵdaımen kez kelgen adam betpe-bet kelýi múmkin. Ókinishke qaraı, jumys oryndarynda oryn alyp jatqan qaıǵyly jaǵdaı úshin jaýapqa tartylyp jatqan jumys berýshini kórý qıyn», - dep jazady basylym.
***
Keshe Qazaqstan Prezıdenti Nursultan Nazarbaev AQSh kongressmenderi Den Berton men Gregorı Mıksti qabyldady. Kezdesý kezinde saýda-ekonomıkalyq jáne halyqaralyq damý máseleleriniń keń aýqymy talqylandy. «Men sizderge Qazaqstanǵa qosh keldińizder demekpin. Táýelsizdiktiń 20 jyly ishinde biz barlyq ózara qarym-qatynastarymyz boıynsha AQSh-pen belsendi yqtymaqtastyq ornattyq. Táýelsizdigimizdi jarııalaǵan soń, kelesi jyly men sizderdiń elde bolyp, AQSh Prezıdenti úlken Djordj Býshpen kezdestim. Biz Qazaqstannyń táýelsizdiginiń qalyptasýyna qoldaý kórsetýdiń túrli máselelerin, sonyń ishinde ıadrolyq qarýsyzdaný máselesin birge talqyladyq. Ózderińiz biletindeı, ol kezde biz ıadrolyq qarýdyń orasan arsenaly men polıgonǵa ıe edik. Sodan beri kóp jyl ótti. Álemde kóptegen ózgerister boldy. Biz tanymal ári qurmet tutar elge aınaldyq. Búginde elimiz aıtarlyqtaı damyp keledi. Biz 2020-2025 jyldary álemniń damyǵan elderi qataryna kirý týraly aldymyzǵa mindet qoıyp otyrmyz», - dep atap ótti Nursultan Nazarbaev. Atalǵan kezdesý boıynsha «Kazahstanskaıa pravda» basylymynyń búgingi sanyndaǵy «Vstrecha s kongressmenamı» atty materıalda tarata jazylǵan.
