«Altyn qalam» ádebı syılyǵy bıyl halyqaralyq deńgeıge shyǵyp otyr
ALMATY. 6 qyrkúıek. QazAqparat /Ádilet Musahaev/ - «Altyn qalam» ádebı syılyǵy bıyl halyqaralyq deńgeıge shyǵyp otyr. Baıqaýǵa Reseı, Ýkraına jáne Qyrǵyzstannyń jazýshylary óz eńbekterin jiberdi. Bul jaıynda búgin Almatyda arnaıy ótken baspasóz máslıhaty kezinde baıqaýdyń uıymdastyrýshylary málim etti.
Esterińizde bolsa 2010 jyly túrli salalardyń ókili bolyp tabylatyn bir top azamat elimizde daryndy qalamgerlerdi taýyp anyqtaýdyń tyń tájirıbesin usyndy. Nátıjesinde álemge tanymal «Býkker» júldesiniń qazaqstandyq balamasy - «Altyn qalam» dúnıege keldi. Ótken jyly osy joba aıasynda kóptegen jas jazýshylar men aqyndardyń shyǵarmalary suryptalyp, eń úzdikteri jáne olardyń avtorlary - qazaq ádebıetindegi jańa esimder qalyń kópshilikke jarııa etildi. Tıisti júldeler «Qara sóz», «Poezııa», «Dramatýrgııa», «Qazaq ádebıetine» qosqan úlesi úshin, basqa da atalymdar boıynsha tabystaldy.
Joba otandyq oqyrmandar qaýymynda, ádebı ortalarda zor serpilis týǵyzdy. Al bıylǵy 2011 jyldan bastap «Altyn qalam» halyqaralyq deńgeıge shyǵyp otyr. Óıtkeni bul saıysqa qazaqstandyq qalamgerlermen qatar shet memleketterdiń ókilderi de qatysýda. «Olardyń týyndylary «Shetel ádebıeti» nomınatsııasy boıynsha jeke baǵalanady. Alǵashqydan bastap «Altyn qalam» ádebı syılyǵynyń tabysqa ıe bolýy onyń demeýshileriniń de sanyn arttyrýǵa áser etti. Qazirdiń ózinde jobanyń resmı demeýshileri retinde «GSM Kazakhstan/Kcell», «Kazkommertsbank» sekildi áleýmet, rýhanııat máselelerine beı-jaı qaramaıtyn isker ortalardy atap ótkimiz keledi. Osy jylǵy «Altyn qalam» júldesiniń taǵy bir erekshiligi - oǵan qatysýshylardyń sany qazaq tildi qalamgerlermen qatar orys tildi shyǵarmashylarmen tolyqqanynda jatyr», -deıdi jobany uıymdastyrýshylardyń biri Qýat Dombaı.
Al Kenje Jumanulynyń aıtýynsha, «Altyn qalam-2011» ádebı syılyǵyna úmitkerlerdiń týyndylary jyldyń basynan beri osy maqsatta ǵalamtorda arnaıy ashylǵan www.arzu.kz saıtynda qabyldanǵan. Bul naýqan 5 qyrkúıek kúni ǵana támámdalǵan. Jalpy alǵanda túrli ádebı janrlar boıynsha qazaq tilinde 74, orys tilinde 45 shyǵarma kelip túsipti.
Aldaǵy bir aıda osy jumystardyń arasynan eń úzdikteri suryptalyp, Qazan aıynda «Altyn qalam» syılyǵy júldegerleriniń esimderi atalady. Eskertip óterligi - jeńimpazdardy jobanyń uıymdastyrýshylary ne qandaı da bir ádebıtetshilerdiń ıá synshylardyń komıssııalary anyqtamaıdy. Túpkilikti sheshimdi atalǵan www.arzu.kz saıtyna enip óz daýystaryn ortaǵa salý arqyly oqyrmandardyń ózderi shyǵarady.
Joǵaryda aıtylǵanmen birge júldeli avtorlar shyǵarmalarynyń jınaǵyn ótken jyldaǵydaı basyp shyǵarý isin uıymdastýryshylyq top óz moınyna alady.
