«Altyn Gran-prı» týrnıri: Qazaqstandyq balýandar 4 altyn medal aldy
ASTANA. QazAqparat - Vengrııanyń Der qalasynda grek-rım kúresinen «Altyn Gran-prı» reıtıngilik týrnırinde otandastarymyz 4 altyn, 2 kúmis, 3 qola medal jeńip aldy, dep habarlaıdy QazAqparat tilshisi.
Kúres túrleri federatsııasynyń baspasóz qyzmeti málim etkendeı, atalǵan dodaǵa álemniń 11 elinen eń tańdaýly balýandar baq synady. Atalǵan dodada Nurym Dúısenov baptaıtyn elimizdiń grek-rım kúresi sheberleri tórt salmaq dárejesinde top jardy.
Jarystyń alǵashqy kúni kilemge shyqqan balýandar arasynda 55 keli salmaqta el namysyn qorǵaǵan Janserik Sársenbıev Gran-prı jeńimpazy atandy. Janserik birinshi beldesýde vengrııalyq balýandy 10:1 esebimen utsa, odan keıin 8:0 esebimen qytaı balýanynyń mysyn basyp, aqtyq synǵa shyqty. Dál osy salmaqta kúresken Qazaqstannyń taǵy bir balýany Qorlan Jaqansha da irikteý saıystaryn sátti ótkizip, fınalǵa joldama alǵan edi. Sóıtip, 55 keli salmaqtyń bas júldesi qos balýanymyzdyń arasynda sarapqa salynyp, jeńis Janseriktiń enshisine jazyldy.
Gran-prı týrnıriniń ekinshi kúni qorjynymyzǵa taǵy úsh altyn medal tústi. 67 keli salmaqta kúresken Meıirjan Shermahanbet pen 77 kelidegi Tamerlan Shadýkaev jáne asa aýyr salmaqtaǵy (130 keli) Nurmahan Tinálıevke Vengrııa jerinde qarsylas shaq kelmedi. Bıylǵy Qazaqstan chempıonatynda top jarǵan ońtústikqazaqstandyq Meıirjan Shermahanbet fınalda Muhamedreza Geraıdi 6:3 esebimen jeńdi. Irandyq balýan alǵashqy aınalymda Almat Kebisbaevty 10:9 esebimen qapy qaldyrǵan edi. Almat óz kezeginde 67 keliniń qola medalin ıelendi.
77 kelide óner kórsetken Tamerlan Shadýkaev fınalda jarys qojaıynynan basym tústi. Al, 130 kelidegi Nurmahan Tinálıev bolsa, fınalda qytaı balýanynan aılasyn asyrdy. Nurmahan aqtyq synǵa deıin Vengrııanyń eki balýanyn jáne qyrǵyz balýanyn utty.
Ókinishke qaraı, Gran-prı týrnıriniń bas júldesin sarapqa salǵan 97 kelidegi Erulan Ysqaqov vengrııalyq balýanmen 3:3 esebimen teń túskenimen, ádis qoldaný barysy joǵary bolǵandyqtan qarsylasynyń joly bolyp ketti.
Qorjynymyzǵa túsken úsh qola medal - Almat Kebisbaev (67 keli), Demeý Jadyraev (72 keli) jáne Mıras Barshylyqovtyń (77 keli) enshisinde.
Komandalyq esepte Qazaqstan quramasy Iran balýandaryn alǵa jiberip, ekinshi orynǵa ıe boldy.
