«Altyn dop» aınalasyndaǵy daý órship barady
ASTANA. 20 qańtar. QazAqparat - Kýveıt, Fıdjı jáne Albanııa bapkerleri «Altyn doptyń» nátıjeleri burmalanyp, olardyń daýystary ózgertilgenin aıtyp, shý shyǵardy.
Danııalyq VT men norvegııalyq Dagbladet basylymdary túnde Bolıvııa, Ekvatorlyq Gvıneıa, Domınıkan Respýblıkasy, Fıdjı, Kýveıt jáne Vanýatý bapkerleri «Altyn dop» nátıjeleriniń sońǵy sátte burmalanǵanyn aıtyp, dabyl qaqqandyǵy týraly shýly aqparat taratqan bolatyn, dep habarlaıdy «Alaman».
Maqalada 2013 jylǵy «Altyn doptyń» jeńimpazy retinde Ronaldýdy basty qarsylastary Lıonel Messı men Frank Rıberıden uzatyp alǵa shyǵarý úshin daýystarynyń qasaqana ózgertilgendigi týraly jetkizgen bapkerlerdiń dáıeksózderi keltirilgen.
Máselen, Kýveıt ulttyq quramasynyń 60 jasar brazılııalyq bapkeri Djorvan Vıeıra: «Men buny tek alaıaqtyq dep baǵalaımyn, sebebi men Ibragımovıchke daýys bergenmin» dep túsinikteme bergen.
FIFA jarııalaǵan daýystardyń resmı tizimi boıynsha, Vıeıra kemý tártibine saı Messı, Neımar jáne Ronaldýǵa daýys bergen. Al, bapkerdiń Zlatanǵa daýys bergendigi týraly aqparat tirkelmegen.
Salmaqty aıyptaýlaryn eseleı túsken VT basylymy sondaı-aq Fıdjı ulttyq quramasynyń bas bapkeri Hýan Karlos Býtsettıdiń de dáıeksózin jarııalady.
«Men óz daýysymdy Krıshtıaný, Messı jáne Rıberıge bergen edim. Al, tizimde meni Levandovskıge berdi dep kórsetipti. Alǵashqy atalǵan úsheýiniń tyrnaǵyna da tatymaıtyn Robertke men eshqashan daýys bermes edim».
Dagbladet Albanııa quramasynyń bas bapkeri, 57 jasar ıtalıandyq Djovannı dı Bıasıdiń narazylyǵyn jarııa etti.
«Men bes upaıymdy Ronaldýǵa, úsheýin Messıge jáne bireýin Ibragımovıchke berdim. Men bes upaıdy Ibragımovıchke bergen joqpyn. Bul baryp turǵan ótirik»,- deıdi ol.
Joǵaryda atalǵan qurama bas bapkerleriniń osylaısha aǵynan jarylýy Katar quramasynyń bapkeri Fahad Ál Zárraanyń «Men prezıdentimniń aıtýy boıynsha Ronaldýǵa daýys berdim, sebebi ol Álem birinshiliginiń Katarda ótkizilýine qolǵabysy úshin Blatterdiń aldynda óz rızashylyǵyn bildirgisi keldi», degen sózderinen keıin qaptaǵan edi.
