«Altyn dombyranyń» ıesi - Jandarbek Bulǵaqov!
ASTANA. 9 jeltoqsan. QazAqparat - Keshe QR Mádenıet jáne aqparat mınıstrliginiń uıymdastyrýymen, "Nur Otan" partııasynyń tikeleı qoldaýymen Táýelsizdik kúnine oraı «Jyryń bolyp tógilemin, elim» atty aqyndar aıtysy ótti.
Bul jolǵy aıtysqa qatysatyn aqyndardy www.kazaitys.kz saıty byltyrǵy 9 jeltoqsandaǵy "Bizdiń el osyndaı" atty aıtysynan qazirge deıingi bir jyl ishinde ótken Respýblıkalyq aıtystarda Bas júlde alǵan aqyndar arasynda reıtıng jasap, 10 aqyndy iriktep shyǵardy. Sonymen, kómeıinen jyr tógilgen, ataǵy alashqa ketken aıtýly aqyndar Balǵynbek Imashev, Aınur Tursynbaeva, Sara Toqtamysova, Bekarys Shoıbekov, Muhtar Nııazov, Jandarbek Bulǵaqov, Jaqsylyq Orynbasar, Nurmat Mansurov, Dıdar Qamıev, Qanat Myrzahandar qatysty.
Ádil qazylardyń biryńǵaı sheshimi boıynsha Bekarys Shoıbekov, Muhtar Nııazov, Jaqsylyq Orynbasar, Qanat Myrzahan, Aınur Tursynbaeva, Sara Toqtamysova qatarly aqyndar árbiri 500 myń teńge kóleminde aqshalaı syıaqy aldy.
kazaitys.kz saıty taǵaıyndaǵan Esenqul Jaqypbekov atyndaǵy arnaıy syılyqty saıttyń Bas redaktory Ularbek Nurǵalymuly belgili qyzylordalyq aqyn Muhtar Nııazovqa tabys etti. Ári 100 myń teńge kóleminde aqshalaı syıaqy berdi.
Sóz kezegin alǵan aıtystyń ádil qazylar alqasynyń tóraǵasy Aldan Smaıyl: «Búgin sahnany án men jyrǵa bólegen aıtyskerlerge kórermender atynan alǵys bildirgim keledi. Búgin aqyndar ózderiniń babynda ekenin kórsete bildi. Qaıym aıtysta da, jumbaq, ótirik aıtystarda qınalǵan joq. Aıtys «Nur Otan» partııasynyń qoldaýymen ótkizilip otyr. Partııa jaqynda qabyldaǵan saıası Doktrınasynda ulttyq qundylyqtardy, qazaqtyń tili, mádenıeti men salt-dástúrin saqtaýdy basymdyq retinde aıqyndaǵan bolatyn Aıtys jyl saıyn respýblıkalyq deńgeıde ótkizilip turýymyz kerek. Ol halyqpen birge bolýy tıis. Aıtystyń arasy uzap ketpeýi kerek. Onyń jańasha mazmunda qaıta oralyp kelip jatqanyna rızamyz», - dep atap aıta otyryp, 3-oryn men 750 myń teńge syıaqyny Balǵynbek Imashevqa tabystady.
«Aıtystyń aqsaqaly» atanǵan Júrsin Erman aǵamyz 2-oryn men 1 mln. teńgeni Nurmat Mansurovqa tabystady.
«Ulttyq sport túrleri qaýymdastyǵynyń» prezıdenti Qaırat Satybaldy 1-oryn men 2 mln. teńge aqshalaı syılyqty Dıdar Qamıevke tabys etti.
«Nur Otan» partııasy Tóraǵasynyń Birinshi orynbasary Baýyrjan Baıbek aıtystyń bas júldesi 3 mln. teńgeni, al byltyrǵy «Altyn dombyra» ıegeri Muhtar Nııazov aıtystyń úsh dúrkin jeńimpazy úshin taǵaıyndalǵan «Altyn dombyrany» Jandarbek Bulǵaqovqa tabys etti, dep jazady kazaitys.kz.
