«Altyn dombyra» aıtysy el arasyna iritki salatyn bolsa, ótkizbeı-aq qoıý kerek - Aıbek Qalıev
ASTANA. QazAqparat - Kúni keshe ǵana Almatyda el Táýelsizdiginiń 25 jyldyǵyna arnalǵan «Altyn dombyra» respýblıkalyq aqyndar aıtysy ótken bolatyn.
Aqyndardyń ónerin QR eńbek sińirgen qaıratkeri Amanjol Áltaev, Qazaqstannyń halyq aqyny Qonysbaı Ábilov, fılologııa ǵylymdarynyń doktory Qoılybaı Asanov, «Daryn» syılyǵynyń laýreaty Muhamedjan Tazabek, «Daryn» syılyǵynyń laýreaty Dáýletkereı Kápuly syndy tanymal aqyndardan jasaqtalǵan qazylar alqasy baǵalady.
Qazylar alqasynyń sheshimimen qyzylordalyq aqyn Muhtar Nııazov «Altyn dombyra» ıegeri atandy. Osymen ekinshi ret bas júldeni ıelengen Muhtardyń jeńisi týraly daý taýsylar emes.
Bul týraly Muhtardyń ózi QazAqparat tilshisine bergen suhbatta: «Meniń «Altyn dombyrany» alýym kezdeısoqtyq emes. Men osy jyldyń basynan beri Tashkentte, Qyzylordada ótken halyqaralyq aıtystardan bas júldeni enshiledim. Atyraýda, Aqtóbede de respýblıkalyq aıtystardan jeńimpaz atanyp, bıylǵy aqyndardyń reıtnıginde birinshi orynda turmyn. Osyǵan deıin nátıjesiz kelip, aıaqastynan «Altyn dombyrany» áldebireýlerdiń yqpalymen alyp kete salǵan joqpyn. Sondyqtan, sahnada aıǵaı-shý bolyp jatsa da, ózime senimdi, joǵary kóńil kúıde boldym. Halyqtyń shý kóterýinen túsingenim, Bolatbek Almatynyń týmasy bolǵandyqtan, ózderiniń ishki seziminde «Altyn dombyrany» Almatyda alyp qalamyz dep, onyń ıesin aldyn ala ózderi belgilep qoıýynan dep oılaımyn», - degen edi.
Osy oraıda tanymal aıtysker aqyn Aıbek Qalıev te óz pikirin bildirip ótti.
«Eki-úsh kúnnen beri «Altyn dombyra» tóńiregindegi daý tolastar emes. Eki jaqty da túsinýge bolady. Men de eki ottyń arasynda ekiudaı sezimde qaldym. Muxtarjannyń dombyrany alǵanyna qanshalyqty qýansam, Aqbókenimniń almaǵanyna sonshalyqty qynjyldym. Áleýmettik jelide Muxtardyń atyna qanshama áńgimeler aıtylyp jatyr, jol shynymen de Bolatbektiki edi, biraq Muxtarda kiná joq qoı. Muxtarǵa jaqsylyq jasaımyn degen keıbir qazylar, kerisinshe kórermen jurtty oǵan qarsy qoıyp qııanat jasap qoıǵan sııaqty. Muxtar da, Bolatbek te meniń eń jaqyn aralasatyn, týǵanymdaı bolyp ketken baýyrlarym. Ekeýi de pendeshilikten joǵary turǵan azamattar. Aqyn degen bir aýyz jyly sózge marqaıyp qalatyn, bir aýyz sýyq sózge júregi aýyratyn jandar ǵoı. Sondyqtan da eki dúldúlimizdiń arasyna kirbiń túsirip, jandaryn jaralap almaıyqshy, aǵaıyn! Qazirgi aıtysta shappa-shap aıtysta, sýyryp salmalyqta Muxtardyń aldyna túsetin, jyrynyń kórkemdigi jaǵynan Aqbókennen ozatyn aqyn joq. Ekeýi de basy men bolyp aıtys aqyndary tarapynan moıyndalyp qoıǵan. Eldi birlikke shaqyratyn «Altyn dombyra» aıtysy osylaısha el arasyna iritki salatyn bolsa, endi ótkizbeı-aq qoıý kerek shyǵar» - dep jazdy aqyn Feısbýktegi paraqshasyna.
