Altyn bolýy yqtımal aımaqtarda barlaý jumystary júrgizilip jatyr
NUR-SULTAN. QazAqparat - «Qazgeologııa» AQ dala jumystarynyń maýsymyn ashty. Aǵymdaǵy jylǵy sáýirde Qaraǵandy oblysynyń Úsh shoqy ýchaskesinde byltyr bastalǵan burǵylaý jumystary jalǵasyn tapty, dep habarlaıdy QazAqparat kompanııanyń baspasóz qyzmetine silteme jasap.
«Ýchaskede topografııalyq-marksheıder jumystary oryndalyp, rekognostsırovkalyq ári tekserý-izdeý marshrýttary salyndy. Sondaı-aq ZTEM ádisi qoldanylǵan aerogeofızıkalyq jumystar júrgizildi. Osynyń nátıjesinde tarıhı materıaldarmen birge geofızıkalyq derekterdi egjeı-tegjeıli zertteý ári olarǵa keshendi taldaý jasaý nátıjesinde baǵalaýǵa usynym berilgen 7 perspektıvaly aýmaq anyqtaldy. Ásirese, Jarsaı jáne Qoıys ýchaskeleri erekshe qyzyqtyryp otyr» delingen kompanııa taratqan habarlamada.
Qoıys ýchaskesinde altynnyń mıneraldanýy qaıtalama kvartsıtterdiń kvarts-serıtsıtti jáne monokvartsty quramymen baıqaldy. Olar keıingi devon jasyndaǵy výlkanogendi qatpardyń joǵarǵy qabatynda óristegen qyshqyl výlkanıttermen baılanysty.
Jarsaı ýchaskesinde altynnyń mıneraldanýy Kókqudyq tóbesi kesheniniń keıingi devon dáýirindegi montsodıorıtti porfırıtter anyqtalǵan jáne uzaqtyǵy 250 - 650m, qýaty 250m deıin kvartstelgen aımaqtarmen baılanysty.
Anyqtalǵan qubylystardy baǵalaý ári kontýrlaryn jasaý úshin 200-600 metrge deıin uńǵymalar burǵylanatyn bolady.
2019 jyly jalpy kólemi 5000 pıkometr 16 uńǵyma burǵylanady. Qazirgi ýaqytta 2 uńǵymany burǵylaý aıaqtalyp qaldy.
