Altyn belginiń altynnan jasalýy mańyzdy emes – mınıstrlik ókili

NUR-SULTAN. QazAqparat – Mektep túlekterine beriletin «Altyn belginiń» quramynda altyn joq bolǵandyqtan, ony sonsha buldaýdyń ne qajettigi baryn suraǵan qazaqstandyqqa mınıstrlik ókili jaýap berdi, dep habarlaıdy QazAqparat vedomstvonyń baspasóz qyzmetine silteme jasap.

Erbolat Bahtııarov esimdi azamat «Altyn belgi» ıegerlerine eshqandaı artyqshylyq pen jeńildikter bolmasa, oǵan talpynyp, tyrysýdyń qajeti nede ekenin suraǵan.

«Oǵan qosa, estýimshe, bylaı buldaıtyndaı «Altyn belgide» aıtarlyqtaı altyn da joq eken?!» degen pikir qaldyrypty ol jelide.

QR BǴM Mektepke deıingi jáne orta bilim berý komıtetiniń tóraǵasy Gúlmıra Kárimovanyń aıtýynsha, «Bilim týraly» zańǵa sáıkes «Altyn belgi» ıegerleri joǵary oqý ornyna túsý kezinde artyqshylyqqa ıe. Mysaly, konkýrs kezinde úmitkerlerdiń jınaǵan baldary teń bolǵan jaǵdaıda «Altyn belgi» ıegerine basymdyq beriledi.

«Meniń túsinigimde, altyn degenimiz – alǵan bilim. «Altyn belgi» kimge beriledi? 11 jyl boıy óziniń ozat bilimin kórsete alǵan oqýshyǵa ǵana beriledi. Sondyqtan, osy eńbekti men altynǵa teńeımin. Sonymen birge, «Altyn belgi» - oqýshyny yntalandyrýdyń bir ádisi. Oqýshynyń úlken jetistikterge jetý jolyndaǵy alǵashqy baspaldaǵy», - deıdi Gúlmıra Kárimova.

Buǵan deıin «Altyn belgige» úmitker túlekterge qoıylatyn talap kúsheıtiletini aıtylǵan bolatyn.