«Altyn belgige» úmitker UBT-da tómen ball alsa, mektep basshylyǵy jaýapqa tartylady – BǴM

NUR-SULTAN. QazAqparat – Ulttyq biryńǵaı testileýde nashar nátıje kórsetken «Altyn belgige» úmitker oqýshy bilim alǵan mektep basshylyǵy jumystan shyǵarylýy da múmkin. Bul týraly QR Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.

«Bıyl Altyn belgige» úmitker oqýshylardyń ulttyq biryńǵaı testileýdi tapsyrý nátıjesine taldaý jasalady. Bul iske ulttyq testileý ortalyǵy jaýapty. Eger «Altyn belgige» úmitti talapker UBT-dan tómen ball alyp, shekti baldy jınaı almasa, onda mektep basshylyǵyn jaýapkershilikke tartamyz. «Altyn belgige» úmitkerlerdiń UBT-ny tıisti deńgeıde tapsyrý men akademııalyq adaldyq prıtsıpi bizdiń baqylaýymyzda, - dedi Ashat Aımaǵambetov mınıstrlikte ótken apparat jıynynda.

Osy oraıda mınıstr bilim basqarmalary men bólimderiniń basshylaryna atalǵan máseleni nazarǵa alýdy eskertti.

«Erteńgi kúni estimedik, bilmedik degen áńgime bolmasyn. Osy másele boıynsha mekteptiń basshylyǵy tikeleı jaýapkershilikke tartylady. Qajet jaǵdaıda jumystan shyǵarý áreketine deıin baramyz. Soǵan daıyn bolyńyzdar», - deıdi ol.

Sondaı-aq, vedomstvo basshysy UBT kezinde talapkerlerge tıisti jaǵdaıdyń jasalý kerektigin eske saldy.

Aıta keteıik, bıyl UBT-da erekshe qajettiligi bar balalarǵa qosymsha ýaqyt beriledi.