«Altyn belgi» ıegerleriniń qanshasy grant aldy
NUR-SULTAN. QazAqparat - Bıyl bilim grantyn taǵaıyndaý nátıjesi 5 kún buryn jarııalandy. Bul týraly elordada ótken brıfıngte QR Bilim jáne ǵylym vıtse-mınıstri Fatıma Jaqypova málim etti, dep habarlaıdy QazAqparat tilshisi.
«Búgin buqaralyq aqparat quraldarynda respýblıkalyq konkýrstyń nátıjesi jarııalandy. Bul - respýblıkalyq konkýrstyq komıssııa jumysynyń nátıjesi, ıaǵnı grant ıeleriniń tizimi aıqyndaldy. Jalpy, bıyl kokýrsqa 53 785 grant bólindi, qatysýshylardyń sany 64 452 adam boldy. Osy oraıda bir grantqa ortasha konkýrs 1,29 adamdy qurady», - dedi F. Jaqypova.
Onyń sózine qaraǵanda, byltyrmen salystarǵanda bıyl grant nátıjeleri 5 kún buryn shyǵaryldy.
«Sonymen qatar, jyl saıyn memleket tarapynan joǵary bilim alýǵa múmkindikter keńeıýde. Jalpy granttardyń sanynda 45 paıyzdan astamy ınjenerlik, qurylys, ІT-mamandyqtarǵa bólingen. 8 myńnan astam grant pedagogıkalyq kásipke arnalǵan. 4 myń grant jaratylystaný ǵylymdary, matematıka jáne statıstıkaǵa baǵyttaldy. Bıyl konkýrsqa qatysqan «Altyn belgi» ıegerleriniń sany 5 myń 800-den astam boldy, onyń 4 myń 600-den astamy grantty aldy», - dedi vıtse-mınıstr.
Budan buryn habarlanǵandaı, búgin 2019 jylǵy memlekettik bilim granty ıegerleriniń tolyq tizimi jarııalandy.
