«Altyn belgi» ıegerleri UBT-dan bosatylmaıdy
ASTANA. QazAqparat - QR Bilim jáne ǵylym mınıstri Erlan Saǵadıevtyń aıtýynsha, ulttyq biryńǵaı testileýdiń jańa formatyn talqylaý barysynda qoǵam tarapynan negizgi eki másele kóterilgen, dep xabarlaıdy QazAqparat tilshisi.
«Birinshiden, ulttyq biryńǵaı testileýden «Qazaqstan tarıxy» pánin alyp tastaýdy usynǵan. Shynymen de, qazirgi kezde ony eki ret: mektepte jáne test kezinde tapsyrady. Alaıda mınıstrlik ony qaldyrý qajet dep sanaıdy. Sebebi bul - óte mańyzdy pán. Ekinshiden, «Altyn belgi» ıegerleri, san alýan xalyqaralyq olımpıadalar men jobalardyń jeńimpazdaryn UBT-dan bosatý týraly usynys bolǵan. Biz ony da qoldaǵan joqpyz. Bizdińshe, ulttyq biryńǵaı testileýdi barlyq oqýshylar tapsyrýy tıis», - dedi E.Saǵadıev.
Aıta keteıik, ulttyq biryńǵaı testileýdiń jańa formatyna sáıkes, kelesi jyldan bastap túlekter mektep dıplomyn alý úshin emtıxan tapsyrady. Al joǵary oqý ornyna túsý úshin biryńǵaı ulttyq testileýdi tapsyrý qajet. «Altyn belgi» ataǵyn mektepterdiń ózderi rastaıdy. Ony ulttyq biryńǵaı testileý kezinde dáleldeýdiń qajeti joq.
