«Altyn belgi» ıegeri atanǵan 14 talapker polıtsııa mamandyǵyn tańdady

ASTANA. QazAqparat – 14 «Altyn belgi» ıegeri jáne qaza tapqan polıtseılerdiń balalary konkýrstan tys Іshki ister mınıstrligi joǵary oqý oryndarynyń kýrsanty atandy. Bul týraly Іshki ister mınıstrliginiń ókili Aqtoty Boranova aıtty, dep habarlaıdy QazAqparat tilshisi.

«Jańa erejege sáıkes vedomstvolyq oqý oryndaryna qyzmettik mindetterin atqarý kezinde qaza tapqan nemese múgedektik alǵan qyzmetkerlerdiń balalary jáne shekti ball deńgeıin jınaǵan Ulttyq ulan qatarynda merzimdi áskerı qyzmet ótkergender, «Altyn belgi» ıegerleri jáne UBT-da keminde 100 ball jınaǵan talapkerler konkýrstan tys túse alady. El prezıdenti Qasym-Jomart Toqaevtyń qyzmetkerlerdi irikteý jáne daıarlaý sapasyn arttyrý jónindegi tapsyrmasyna sáıkes, polıtsııa vedomstvosynyń joǵary oqý oryndary úshin bilim berý baǵdarlamalarynyń tizbesi keńeıtildi. Endi oqytý jedel-izdestirý, ákimshilik-quqyqtyq, jedel-krımınalıstıkalyq, qylmystyq-atqarý qyzmeti, sotqa deıingi tergeý, ІT-krımınalıstıkalyq qamtamasyz etý, kıberqaýipsizdik, aqparattyq júıeler men tehnologııalar, pedagogıka jáne psıhologııa sııaqty baǵyttar boıynsha júrgiziledi», - A. Boranova mınıstrliktiń baspasóz alańynda ótken brıfıngide.

Onyń aıtýynsha, 17-26 shilde aralyǵynda vedomstvolyq joǵary oqý oryndaryna túsý úshin ótinimder qabyldaý jáne konkýrstyq irikteý ótti. Іrikteýge Almaty, Qaraǵandy jáne Qostanaı akademııalaryndaǵy 800 orynǵa Qazaqstannyń túkpir-túkpirinen 1500 talapker qatysty.

«Konkýrstan tys oqýǵa túskenderdiń arasynda 14 «Altyn belgi» ıegeri, UBT-da 100-den astam ball jınaǵan 25 talapker jáne qaza tapqan ishki ister organdary qyzmetkerleriniń úsh balasy bar», - dedi vedomstvo ókili.