Altyn arzandasa da, eldiń altyn valıýta qory ulǵaıdy - Erbolat Dosaev

NUR-SULTAN. QazAqparat – Álemde altyn arzandasa da, Qazaqstannyń altyn valıýta qory ulǵaıdy. Bul týraly QR Ulttyq bankiniń tóraǵasy Erbolat Dosaev Úkimet otyrysynda málim etti, dep habarlaıdy QazAqparat tilshisi

«Eldiń altyn valıýta rezervteri bir aıda 1,8 mlrd AQSh dollaryna ulǵaıyp, tamyzdyń sońynda 36,8 mlrd AQSh dollaryn qurady. Altyn portfeli bir ýntsııa úshin 1 814 AQSh dollaryna deıin (0,8%-ke) tómendegenine qaramastan, basym quqyqty paıdalanyp altyn satyp alý esebinen 134 mln AQSh dollaryna ósti», - deıdi Ulttyq bank tóraǵasy.

Sonymen birge, ol tamyz aıynda Halyqaralyq valıýta qorynan arnaıy qaryz alý quqyǵy 1,6 mlrd dollar sheginde bolǵanyn, ekinshi deńgeıdegi bankterdiń shetel valıýtasyndaǵy korrespondenttik shottary men depozıtteri óskenin atady.

«Ulttyq qordyń aktıvterin qosa alǵanda, jalpy halyqaralyq rezervter bir aıda 1,8 mlrd AQSh dollaryna ulǵaıyp, 93,7 mlrd AQSh dollaryn qurady», - dedi Ulttyq bank basshysy.