«Altyn adamnyń» zergerlik buıymdary Tatarstanda kórmege qoıylady
ASTANA. QazAqparat -15 naýryzda Tatarstan Respýblıkasynda «Uly dala: tarıh jáne mádenıet» kórmesi ashylady, dep habarlaıdy QazAqparat QR Ulttyq mýzeıiniń baspasóz qyzmetine silteme jasap.
Shara halyqaralyq «Altyn adamnyń álem mýzeılerine sherýi» jobasy aıasynda 2019 jylǵy 15 naýryz-15 sáýir aralyǵynda ótedi.
Kórmeniń maqsaty - Qazaqstannyń tarıhı-mádenı baı murasymen sheteldik kórermendi tanystyrý. Kórmege Qazaqstan Respýblıkasynyń sımvoly sanalatyn «Altyn adam» qoıylady.
1960-jyldardyń sońy men 1970-jyldardyń basynda Almatynyń mańaıynda tanymal arheolog Kemal Aqyshev zerttep júrgen Esik qorǵanynan artynan Qazaqstannyń sımvolyna aınalǵan saq patshasy - «Altyn adamnyń» súıegi tabylǵan arheologııalyq sensatsııa oryn aldy. Baǵa jerpes oljaǵa «Qazaq Týtanhamony» degen at berilip, ǵasyr jańalyǵy dep tanyldy. Ejelgi dala bıleýshisiniń tájisindegi qanatty altyn pyraq áshekeıleri Qazaqstan Respýblıkasy eltańbasynyń bólshegine aınaldy, al Altyn adamnyń músini Almatydaǵy Táýelsizdik alańyna ornatyldy. 
Jarty ǵasyrǵa jýyq ýaqyt ótkennen keıin Qazaqstan Respýblıkasy Ulttyq mýzeıi halyqaralyq «Altyn adamnyń álem mýzeılerine sherýi» saıahatyn jarııalady. Aýqymdy joba sheńberinde Belorýs, Reseı, Ázerbaıjan, Qytaı, Polsha jáne Ońtústik Koreıa mýzeılerinde kórmeler úlken jetistikpen ótti. Kórme 2019 jyldyń sońyna deıin jer sharynyń alty eline baratyn bolady.
Memlekettik «Qazan Kremli» qoryq-mýzeıindegi kórmeden kıimi altyn japsyrmaly jáne jebe, qar barysy, arqar, jylqy jáne qus túrindegi altyn tilimsheler áshekeılep turǵan konýs pishindi erekshe bas kıimdi Altyn adamnyń rekonstrýktsııasyn jáne osy jas aq súıek saq jaýyngerimen (arheologtardyń pikirleri boıynsha 17-18 jastar shamasynda) birge jerlengen erte temir ǵasyrynyń (b.d.d V-IV ǵǵ.) arheologııalyq oljalarynyń kollektsııasyn tamashalaýǵa bolady.
Kórmege Qazaqstan Respýblıkasy Ulttyq mýzeıiniń qorlarynan barlyǵy 127 zat usynylady. Kórmege usynylatyn Qazaqstannyń ejelgi jáne ortaǵasyrlyq óneriniń jaýharlary - bul Eýrazııa dala mádenıeti murasynyń ózindik ereksheligin kórsetetin burynǵynyń ataýsyz sheberleri týyndylarynyń az ǵana bóligi.
