«Altyn adamnyń» zergerlik buıymdary Qytaıda kórmege qoıylady

ASTANA. QazAqparat - 12 shildede halyqaralyq «Altyn adamnyń álem mýzeılerine sherýi» jobasyn júzege asyrý aıasynda sheteldik aýdıtorııaǵa Eýrazııa kóshpendileriniń mádenıeti men ónerin tanystyratyn «Uly Dala murasy: zergerlik óner jaýharlary» atty biregeı kórme ashylady, dep habarlaıdy QazAqparat Ulttyq mýzeıdiń baspasóz qyzmetine silteme jasap. Kórmeni uıymdastyrýshy - Qazaqstan Respýblıkasynyń Ulttyq mýzeıi men Shensı Tarıh mýzeıi. 

«Altyn adam» túsinigi tarıh ǵylymynda ataqty arheolog ǵalym, qazaqstandyq arheologııanyń negizin qalaýshylardyń biri Kemal Aqyshevtiń arqasynda paıda boldy. Tolyqtaı altynan kıim kıgen saq jaýyngeri - birinshi «Altyn adam» tabylǵan Qazaqstannyń ońtústigindegi Esik qorǵanynda zertteý júrgizgen mine osy kisi bolatyn. Baǵa jetpes qazyna ǵasyr jańalyǵy retinde tanylyp, shartty túrde «Altyn adam» dep ataldy. 

Qorǵannan jaýyngerdiń kıimin sándegen barlyǵy 4800 altyn buıym tabylǵan bolatyn. Bul buryn-sońdy tabylǵan qorǵandar ishindegi Mysyr perǵaýyny Týtanhamon qabirinen keıingi eń kóp altyn áshekeıler bolatyn. Qorymdaǵy zattardyń topografııasy: zertteýshiler jerlengen jaýyngerdiń saltanatty saýyt-saımanyn, temir qylyshy men qanjarynyń qaldyqtaryn ter tógip zertteý nátıjesinde saq jaýyngeriniń kelbetin jańadan jasap shyqty.

«Ekspozıtsııalanatyn kollektsııa tiziminde XV ǵasyrdyń basyna tán dep belgilengen zergerlik ónerdiń biregeı týyndylary, sol sııaqty Ortalyq Qazaqstandaǵy Taldy-ІІ qorǵanynan tabylǵan jádigerler de bar. 2012 jylǵy sáýirde tarıh ǵylymdarynyń doktory, professor M. Syzdyqovtyń basshylyǵymen Batys Qazaqstan oblystyq tarıh jáne arheolgııa ortalyǵynyń arheologııalyq otrıady Terekti aýdanyndaǵy Taqsaı-І kesheninde zertteý jumystaryn júrgizip, nátıjesinde tabylǵan aqsúıek sarmat áıeli kıiminiń rekonstrýktsııasy da tanystyrylady» delingen habarlamada.

Qazaqstan Respýblıkasy Ulttyq mýzeıi qorlarynan usynylǵan altyn zattardyń az ǵana bóligi - Eýrazııa dala mádenıeti murasynyń ózindik ereksheligin kórsetetin burynǵynyń ataýsyz sheberleriniń týyndylary olardyń kórkemóner dástúrleriniń úzdiksizdigin taǵy da bir ret dáleldeıdi.