«Altyn adamdy» tapqan arxeolog Beken Nurmuhanbetuly ómirden ozdy
ASTANA. QazAqparat - Almaty oblysynyń «Esik» qoryq-mýzeıiniń qyzmetkeri, arheolog, ataqty «Altyn adam» jaýyngerin tapqan Bekmuhanbet Nurmuhanbetuly 81 jasyna qaraǵan shaqta jaryq dúnıemen qosh aıtysty.
Bul týraly Qazaqstan mýzeıleriniń Kazmuseum.kz resmı saıty xabarlaýda.
«Almaty oblysynyń «Esik» qoryq-mýzeıiniń qyzmetkeri, arheolog, el arasynda «Altyn adam» atanyp ketken Bekmuhanbet Nurmuhanbetuly aqsaqal 81 jasynda dúnıeden ótti. Marqumnyń otbasy men týǵan-týystaryna qaıǵysyna ortaqtasyp kóńil aıtamyz. Beken atamyzdyń jarqyn beınesi məńgi esimizde qalady!» - delingen xabarlamada.
Aýyr qazaǵa baılanysty QazAqparat xalyqaralyq aqparat agenttigi kórneki ǵalymnyń týǵan-týystaryna kóńil aıtyp, qaıǵylaryna ortaqtastyq tanytady.
Bekmuhanbet Nurmuhanbetov 1935 jyly Almaty oblysy Aqsý aýdany Eńbek aýylynda týǵan. Jetisý jerinen tabylyp, búkil álemge Qazaq eliniń tarıhı tólqujaty bolyp tanylǵan, kóne saq mádenıetiniń baǵa jetpes asyl qazynasy - «Altyn adam» jádigeri adamzat tarıhyn altyn zermen bederlegeni aqıqat. 1969 jyly arheologııa ǵylymyna ózindik iz qaldyrǵan kórnekti ǵalym K.Aqyshev bastaǵan zertteý toby álemge «Altyn adam» ataýymen maǵlum bolǵan saq jaýyngeriniń obasyn tapty. Ózge mádenıet ókilderi tas qashap, teri jamylyp júrgende saqtardyń ozyq tehnologııany meńgerip, kúni búginge deıin qorytý tásili beımálim bop otyrǵan altyn buıymdarǵa ıe bolǵany anyqtalǵan bolatyn.
