Altyn adamdy álemdik shedevrge aınaldyrý qajet - Arystanbek Muxamedıuly

ASTANA. QazAqparat - Úkimettiń búgingi otyrysynda QR Mádenıet jáne sport mınıstri Arystanbek Muxamedıuly Esik qorǵanynda tabylǵan Altyn adamdy álemge keńinen nasıxattap, Rembrant pen Leonardo da Vınchıdiń týyndylary deńgeıine deıin kóterýdi usyndy. Osynyń arqasynda Qazaqstanǵa týrısterdi kóptep tartýǵa bolady, dep xabarlaıdy QazAqparat tilshisi.

"Álem boıynsha mýzeılerge týrısterdiń kóptep baratyny belgili. Bárimiz jaqsy bilemiz, ondaı mýzeılerdiń árbireýinde bir shedevr bar. Máselen, Lývrǵa baratyndardyń 70-80 paıyzy Leanardo da Vıchnıdiń "Djokondasyn" kórýge asyǵady. Al Ermıtajda Remrandtyń "Adasqan uldyń oralýy" atty týyndysyn kórgisi keledi. Árıne, ózimizdiń Ulttyq mýzeıimizge degen týra sondaı qyzyǵýshylyqty týǵyzý úshin qymbat bir shedevrdi satyp alý qajet. Al Sotbıs aýktsıonynda ol shedevrlerdiń tómengi baǵasy 100 mıllıon dollardan bastalady", - deıdi Muxamedıuly.

Osy oraıda mınıstr Altyn adam sııaqty Qazaqstannyń ózindik shedevrin keńinen nasıxattaý qajet dep sanaıdy. Ol úshin álemdik aty bar mýzeılerde kóshpeli kórmelerdi uıymdastyryp, tanymal arnalardan Altyn adam týraly derekti jáne anımatsııalyq fılmderdi kórsetýge bolady.

"Áli esimde, Reseıdiń Memlekettik Ermıtajyna Altyn adamdy alǵash ret aparyp qoıǵanda biraz qıynshylyqtar boldy. Sol kezde biz Petrovskıı myrzadan ekpozıtsııany 20 kúnge deıin uzartýdy suraǵanbyz. Alaıda eki aptadan keıin ol ózi qońyraý shalyp, Altyn adamdy eki aıǵa deıin qaldyrýdy surady. Bul degenimiz, jergilikti xalyqtyń tarapynan úlken qyzyǵýshylyq boldy", - dep atap kórsetti Arystanbek Muxamedıuly.