«Altyn adam» Máskeý kórmesine qoıyldy
ASTANA. QazAqparat - «Rýhanı jańǵyrý» baǵdaralmasy aıasynda QR Mádenıet jáne sport mınıstrligi júzege asyryp jatqan «Altyn adamnyń álem mýzeılerine sherýi» halyqaralyq jobasy aıasynda Máskeýde ejelgi dala órkenıetiniń biregeı murasy usynyldy, dep habarlaıdy QazAqparat.
Halyqtyq jáne sándik-qoldanbaly ónerdiń búkilreseılik mýzeıi Qazaqstan Respýblıkasy Ulttyq mýzeıimen birlesip uıymdastyryp jatqan «Uly dala murasy: zergerlik óner jaýharlary» kórmesine kelgen Máskeý turǵyndary men qonaqtary Qazaqstanyń nyshany retinde búkil álemge tanymal bolǵan «Altyn adam» eksponatyn tamashalaýǵa múmkindik aldy.
Sonymen qatar kórmege Qazaqstan Respýblıkasy Ulttyq mýzeıiniń qorlarynan HІH ǵasyr men HH ǵasyrdyń ortasyna deıingi ýaqytqa jatatyn kúmisten jasalǵan áıelder áshekeıleri, bizdiń zamanymyzǵa deıingi VII-ІІІ ǵasyrlarǵa tıesili altyn buıymdar qoıylǵan. Tanystyrýǵa qoıylǵan jádigerlerdiń jalpy sany 170-ten asady.
Kórmeniń saltanatty ashylý rásiminde sóz sóılegen Qazaqstannyń Reseı Federatsııasyndaǵy Tótenshe jáne ókiletti Elshisi Imanǵalı Tasmaǵambetov kelýshiler nazaryna usynylyp otyrǵan artefaktiler saq mádenıetiniń zoomorftyq «ań» stılin pash etetindigimen biregeı sanalatyndyǵyn basa aıtty.
«Sizderdi osynaý kórmede qarsy alý biz úshin úlken mártebe. Bul kórme biregeı sanalady. Sebebi Esik qorǵandar kesheni men «Altyn adam» - bul elimzidiń eń myqty tarıhı-mádenı eskertkishteriniń biri. Qazirgi Qazaqstan aýmaǵy - bul 8 ǵasyrdan bastap bizdiń zamanymyzǵa deıin saq mádenıetiniń qalyptasyp, odan ary damyǵan keńistigi. (...) Kóshpeliler, saqtar osynaý mádenıettiń tasymaldaýshylary retinde óte baı tarıhı mura qaldyrdy. Degenmen, ókinishke oraı aýmaly-tókpeli zaman sol artefaktilerdiń azdaǵan bóligin ǵana búgingi kúnge deıin saqtaýǵa múmkindik berdi. Aıta keterligi, «Altyn adam» 4 myń altyn buıymdar túrinde tabyldy. Bul Esik kesheni qorǵandarynyń qaptaldaǵy qorymynyń birinen ǵana alynǵan buıymdar»,- dedi Elshi.
RF Mádenıet mınıstriniń birinshi orynbasary Vladımır Arıstarhov Máskeýde ashylǵan kórme «Altyn adamnyń» álemdik sherýiniń bastaýy ekendigin atap ótti.
«TMD elderimen mádenı alys-beris pen yntymaqtastyq Reseı Federatsııasy Mádenıet mınıstrligi jumysynyń basymdyǵy sanalady. «Altyn adamnyń álem mýzeılerine sherýi» halyqaralyq jobasynyń birinshi kórmesiniń Máskeýde ótýi biz úshin zor mártebe. «Altyn adamnyń» tabylýy 20 ǵasyrdaǵy arheologııa salasynyń eń iri oqıǵalarynyń biri bolyp tabylady», - dedi Vladımır Arıstarhov.
Al RF Prezıdentiniń halyqaralyq mádenı yntymaqtastyq jónindegi arnaıy ókili Mıhaıl Shvydko búgingi kórmeden qazaq memleketiniń shyǵý tegin, halyqtyq tanymy men mádenıetin kórýge bolatyndyǵyn basa aıtty.
«Búginde biz sońǵy jyldary eldiń qalaı qarqyndy damyp kele jatqanyna jáne onda Prezıdent Nursultan Nazarbaev qandaı mańyzdy rólge ıe ekendigine kýámiz. «Altyn adam» eldiń baı-baqýatty damý tumaryna aınalsyn», - dedi ol.
Aıta keterligi, kórme 13 mamyrǵa deıin jalǵasady. «Altyn adamnyń álem mýzeılerine sherýi» halyqaralyq kórme jobasynyń marshrýtyna Shyǵys Azııa (Japonııa men Koreıa), Eýropa (Avstrııa men Frantsııa), sonymen qatar TMD elderi men AQSh kiredi.
Jobasynyń maqsaty Eýrazııanyń Uly Dala beldeýiniń baı mádenı murasymen sheteldik qoǵamdastyqty tanystyrý.
