Altyn adam: Qorymnyń tonalǵanyna qaramastan bul sensatsııalyq jańalyq boldy - arheolog

AQTÓBE. QazAqparat - Á.Marǵulan atyndaǵy arheologııalyq ınstıtýttyń Aqtóbedegi ókili altyn buıymdarymen jerlengen adamnyń tabylýyn sensatsııalyq jańalyqqa balady, dep habarlaıdy QazAqparat tilshisi.

Arheolog Arman Bısembaev áleýmettik jelide óz jańalyǵymen bólisti. «Á.Marǵulan atyndaǵy arheologııalyq ınstıtýttyń ujymy Aqtóbe oblysynda qazba jumysyn júrgizdi. Birer kún buryn biz Temir aýdanyndaǵy «Tasqopa 1» qorymynda aqsúıektiń qabirin taýyp, sensatsııalyq jańalyq ashtyq. 5,7 metr tereńde jatqan qabirden erterekte tonalǵanyna qaramastan altynnan jasalǵan at ábzeli, jerleýge arnalǵan saltanatty kıim (bas kıimi bolýy múmkin) tabyldy. Bul Sarmat dáýirine jatady dep boljap otyrmyz. Arheologııalyq ınstıtýt zertteýdi jalǵastyrady. Alda jańalyqtar bolady», - dep jazdy Arman Bısembaev.

Eske salsaq, Aqtóbeniń Temir aýdany, Tosqopa aýylynda qorymnan altyn buıymdarmen jerlengen adam súıegi tabyldy.