«Altyn adam» kórmesi Eýropanyń taǵy birneshe qalasynda ótkiziledi - Muhamedıuly

ASTANA. QazAqparat - Qazaqstannyń qasıetti jerlerin álemge tanytý baǵytynda qandaı sharalar qolǵa alynyp jatyr? Bul týraly Aqordada QR Prezıdent Ákimshiliginiń Basshysy Áset Isekeshevtiń tóraǵalyǵymen ótken Qoǵamdyq sanany jańǵyrtý baǵdarlamasyn júzege asyrý boıynsha ulttyq komıssııanyń kezekti otyrysynda QR Mádenıet jáne sport mınıstri Arystanbek Muhamedıuly baıan etti, dep habarlaıdy QazAqparat tilshisi.

«Bizdiń mınıstrlik «Qazaqstannyń kıeli jerleriniń geografııasy» jobasyn júzege asyrýda. Jobanyń ádistemelik, ǵylymı jáne praktıkalyq baǵyttaryn 2017 jyly Ulttyq mýzeıdiń janynan qurylǵan «Qasıetti Qazaqstan» ortalyǵy men «Týǵan jer» ǵylymı qaýymdastyǵy júrgizedi. Jobanyń negizgi maqsaty men nátıjeleri «Qazaqstannyń kıeli jerleriniń geografııasy» respýblıkalyq forýmynda qaralǵan bolatyn. Forýmǵa jetekshi tarıhshylar men arheologtar, etnograftar men atqarýshy organdardyń ókilderi qatysty. Barlyq qasıetti jáne tarıhı oryndardy, Qazaqstannyń túkpir-túkpirindegi eskertkishterdi júıelendirý úshin ákimdiktermen birlese jumys júrgizilip jatyr. Alty baǵyt boıynsha, atap aıtqanda Soltústik, Shyǵys, Batys, Ońtústik, Ortalyq jáne Ońtústik-Batys baǵytta ǵylymı-zertteý ekspedıtsııasy iske asyryldy. Osy jumystardyń qorytyndysy boıynsha ulttyq mańyzy bar 185 jáne aımaqtyq mańyzy bar 456 oryn tańdap alyndy», - dedi Arystanbek Muhamedıuly.

Mınıstrdiń aıtýynsha, aımaqtardyń negizgi nysandary boıynsha «Kıeli Qazaqstan» entsıklopedııasynyń alǵashqy tomy jaryqqa shyqqaly jatyr. Aldaǵy ýaqytta dál osyndaı bes kitap shyǵarylady. Sonymen birge, materıaldar vırtýaldy kartada da qoljetimdi bolmaq.

«Jahandyq ınternette Qazaqstan qasıetti oryndarynyń brendin qalyptastyrý úshin úsh tilde 30-ǵa tarta vıdeorolık daıyndaldy. BBC world news, Viasat history, National geographic telearnalary amerıkalyq Castle Film kompanııasymen birlese otyryp, «Kóshpendiler jeri», «Altyn adam» «Qazaqstannyń qasıetti jerleriniń geografııasy», «Qoja Ahmet ıAsaýı», «Aısha Bıbi» fılmderi kórsetilýde. Osy jyldyń qarashasynda BBC World News-pen birlese otyryp, «Travel shows of Kazakhstan» atty jobany bastaý josparlanyp otyr. Oǵan Qazaqstannyń týrıstik áleýeti týraly bes baǵdarlama enedi. Sonymen birge, álemniń jetekshi mýzeılerinde Altyn adamnyń kórmesi ótkizildi. Kórmeler Ońtústik Koreıa, Reseı, Belarýs, Ázerbaıjan, Qytaı, Polsha elderinde uıymdastyryldy. Jaqyn arada dál osy joba Ulybrıtanııa, Grýzııa, AQSh, Avstralııa, Italııa men Frantsııada ótkizilmek», - dedi mınıstr.