«Altyn adam» álemniń áıgili mýzeılerinde kórsetiletin bolady
«Altyn adam» kórmesi ótken jyly jeltoqsan aıynda Belarýs astanasy Mınskide alǵash uıymdastyrylyp, bir jyl ishinde Máskeý, Baký, Seýl, Gdansk (Polsha) jáne Qytaıdyń Sıan qalasynda ótti. Ondaǵy maqsat- ejelgi temir dáýirindegi qundy dúnıelerdi kórsete otyryp, sheteldikterdi dalalyq órkenıetpen tanystyrý. Kórmeniń basy jádigeri árıne «Altyn adam», odan bólek sol zamannyń kýási bolatyn arheologııalyq buıymdar qoıyldy. Kórme sheteldikterdiń erekshe qyzyǵýshylyǵyn týǵyzdy, mysaly Qytaıdyń Shensı provıntsııasyndaǵy tarıhı mýzeıge barlyq sany 370 jádiger qoıylyp, ony tamashalaýǵa 170 myńnan astam adam keldi», - dedi QR Ulttyq mýzeıi dırektorynyń orynbasary Abaı Satybaldın.
Onyń aıtýynsha, aldaǵy jyldary atalǵan joba óz jalǵasyn taýyp, «Altyn adam» álemniń tanymal mýzeılerine qoıylatyn bolady.
«Aldaǵy jyly atalǵan kórme Ózbekstan, Tatarstan jáne Japonııa elderiniń ulttyq mýzeılerine qoıylady. Al 2020 jyly Eýropanyń Frantsııa, Germanııa, Italııa jáne Gollandııanyń mańdaıaldy mýzeılerine, sondaı-aq, AQSh-qa aparý josparlanýda. Sonymen qatar, aldaǵy ýaqytta kórme jádigerleriniń sany artyp, onda qoıylatyn buıymdardyń ereksheligine mán beriledi», - dedi ol.
Buǵan deıin habarlaǵanymyzdaı, «Altyn adamnyń álem mýzeılerine sherýi» halyqaralyq kórmesi bıyl álemniń 6 elinde bolyp, ony 200 myń astam sheteldik kórermen tamashalady.