«Altyn adam» álemniń 12 elin aralap shyqty

NUR-SULTAN. QazAqparat – Elordadaǵy Ulttyq mýzeıde «Altyn adamnyń álem mýzeılerine sherýi» halyqaralyq kórme jobasy qorytyndylandy, dep habarlaıdy QazAqparat tilshisi.

Qorytyndy baspasóz máslıhatyna Túrkııa, Reseı, Ózbekstan, Malaızııa elderindegi mýzeı basshylyǵyndaǵy ókilder qatysty.

Jobanyń maqsaty – «Esik» qorǵanynan tabylǵan «Altyn adamdy» álemniń tanymal mýzeılerinde kórsete otyryp, sheteldik kórermendi halqymyzdyń ejelgi tarıhy, baı mádenıeti jáne qaıtalanbas ónerimen tanystyrý. Halyqaralyq joba Reseıdegi «Qazan Kremli» memlekettik qoryq-mýzeıinen bastaý alyp, odan keıin «Uly dala: tarıh jáne mádenıet» kórmesi bolyp Ózbekstan, Soltústik Makedonııa, Túrkııa, Malaızııa, Grekııanyń jetekshi mýzeılerinde jalǵasty. Qazaqstannyń sımvolyna aınalǵan «Altyn adam» úsh jyldyń ishinde 12 elde kórsetildi.

Kórmege qoıylǵan jádigerler – dala órkenıeti men kóshpeli ımperııanyń uly jeńisteriniń kýási. Altyn japsyrmalarmen tigilgen kıimdegi «Altyn adamnyń» rekonstrýktsııasy kórmeniń negizgi eksponaty retinde qoıyldy. Kórme atbegilik mádenıettiń qalyptasýyn, ejelgi metallýrgııanyń damýyn, saq kezeńindegi ań stıliniń damý erekshelikteri men sabaqtastyǵyn, Uly Jibek jolynyń ortaǵasyrlyq qalalyq mádenıetiniń damýyna qosqan úlesin jan-jaqty tanytty.

«Arheologııa salasynda eńbek etip kele jatqanyma 20 jyldaı bolyp qaldy. Kórmeni qabyldaǵan kezde qatty qýandym. Sebebi, Uly dalanyń, Eýrazııanyń murasy men kóshpeli mádenıetke qyzyǵýshylyǵym burynnan bar. 2017 jyly saqtar týraly kórmeni tamashalanǵanmyn. Sol kezde Eýrazııanyń mádenı muralaryn óz mýzeıimizde kórsetsek keremet bolar edi dep oıladym. Іzdegenge suraǵan – Balqan aımaǵyna Qazaqstan tarapy kórmemen keldi. Kórme kelerde bizden alys jatqan mádenıet kóshi elimizge aıaq basty dep oıladyq. Biraq, bizdiń qundylyqtardyń kóshpeli mádenıetke jaqyn tustary óte kóp ekenine kózimiz jetti», - dedi elordada ótken baspasóz máslıhatynda Soltústik Makedonııa Ulttyq arheologııalyq qoryq-mýzeıiniń dırektory Goran Sanev.

Qorytyndy baspasóz máslıhatynda belgili qazaqstandyq arheolog-ǵalym, Qazaqstannyń ulttyq arheologııa mektebiniń negizin qalaýshy Kemel Aqyshevtyń týǵanyna 95 jyl tolýyna oraı derekti fılm kórsetildi.