Alty jyldyń ishinde Astanadan 1 mıllıon tonnadan astam qoqys shyǵaryldy
ASTANA. QazAqparat - Alty jyldyń ishinde Astanadan 1 mıllıon tonnadan astam qoqys shyǵaryldy. Jyl ótken saıyn elordada qoqys jınaý júıesi jetildirilip keledi, plastıkke arnalǵan konteınerlerdi ornatý jumystary júrgizilip jatyr, aldaǵy ýaqytta qaǵazǵa arnalǵan jáshikter de qoıylmaq, dep jazady elordanyń resmı saıty.
Qazirgi kezde «Astana-Tazartý» kásipornynda 500-den asa adam eńbek etedi, kún saıyn 47 tehnıka baǵyt boıynsha shyǵady. Jumys táýlik boıǵy rejımde júredi. Birinshi top tańǵy saǵat 5-te, ekinshisi kúndizgi saǵat 2-de shyǵady.
«Astana-Tazartý» JShS bas dırektory Ivan Lavrınenkonyń aıtýynsha, elordany abattandyrý erejelerine sáıkes, qoqys shyǵarý kúnine bir ret júrgiziledi, biraq qalanyń qarqyndy damyp, ósip kele jatqanyn eskere otyryp, kóptegen núktelerge kúnine 2-3 retten barýǵa týra keledi, bul konteınerlerdiń tolyp ketýine jol bermeý úshin jasalady.
«Qala 24 ýchaskege bólingen, árbir aýdanda aǵa sheber, árbir ýchaskede ınspektorlar bar, olar kúnde barlyq núktelerdi tekserip, konteıner alańdarynda bolyp jatqannyń bárin baqylap otyrady. Mashınalar GPS baqylaý júıesimen jabdyqtalǵan, barlyǵy kúndelikti negizde baqylanyp, monıtorıng júrgiziledi. Budan basqa, qazir biz qalanyń elektrondy kartasyn ázirlep jatyrmyz, bizdiń barlyq zańdy jáne jeke nútkelerimiz osy kartaǵa tirkeledi, nátıjesinde biz qalada bolyp jatqannyń bárin onlaın rejımde baqylap otyramyz. Barlyq konteıner alańdarynyń fotosýretteri osy kartaǵa engiziledi, paıdalanýshylar ózderi qarap otyrady, karta bizdiń saıtta ornalastyrylady. Bul kóp eńbekti qajet etetin jumys, bul júıe kelesi jyly iske qosylady dep oılaımyn», - dedi Ivan Lavrınenko.
Búginde qoqysty bólip jınaý boıynsha joba nasıhattalýda. Ár apta saıyn qalada 30-50 konteıner, jyl sońyna deıin 686 qoqys jáshigi ornatylady. Arnaıy ekologııalyq qoqys tasymaldaǵysh mashınalary kún saıyn bir tonnadaı plastık shyǵaryp júr.
«Biz ázirge plastık pen qaǵazǵa toqtaldyq. Turǵyndardan plastık salatyn konteınerlerge alıýmınıı bankalaryn salýdy da suraıtyn shyǵarmyz. Óıtkeni sondaı da suranys bar, adamdar surap jatyr. Shynyǵa arnalǵan jeke jáshikter ornatýdyń qajettiligi joq, óıtkeni Qazaqstanda shyny óńdeý óndirisi joq, sol sebepti ony jaı jınaý orynsyz. Qaǵazǵa arnalǵan bólek konteınerler ornatylady, qazir olar jasalýda. Jańa jyldan bastap ornatpaqpyz», - dedi Ivan Lavrınenko.
Alda ótetin EKSPO-2017 kórmesi qarsańynda qalada qaıta artý stantsııalaryn iske qosý josparlanǵan. Bul qoqys jınaý ýaqytyn qysqartýǵa múmkindik beredi. Astananyń aınalasyna qýatty mashınalar ornatylady, ár aýdanda eki stantsııadan bolady, ol jerge qoqys tasymaldaǵysh mashınalar jetip, júkterin tastap, ary qaraı baǵyttary boıynsha shyǵatyn bolady.
