Alty jylda elimizdegi 170 shaqty aýrýhananyń medıtsınalyq tehnıkasy jańartyldy

ASTANA. QazAqparat - 2010 jyldyń qarashasynan 2016 jylǵy qazanǵa deıin QR Densaýlyq saqtaý jáne áleýmettik damý mınıstrliginiń «QazMedTeh» AQ kómegimen 167 densaýlyq saqtaý uıymynda medıtsınalyq tehnıka jańartyldy. Osy kezeńde lızıngke 500 astam birlik medıtsınalyq tehnıka satyp alyndy, dep habarlaıdy mınıstrliktiń baspasóz qyzmeti.

«QazMedTeh» AQ tek osy jyly lızıngke medıtsınalyq tehnıka alýǵa 225 ótinimdi maquldady. 2016 jyldyń basynan bastap respýblıkanyń densaýlyq saqtaý uıymdarynda 61 birlik medıtsınalyq tehnıka ornatyldy, jyldyń sonyna deıin taǵy 27 ornatylatyn bolady. 137 birlik medıtsınalyq tehnıka kelesi jyly emhanalar men aýrýhanalarǵa jetkiziledi.

Qazaqstannyń óńirleri arasynda medıtsınalyq tehnıkany lızıngke alý júıesin Pavlodar oblysynyń medıtsınalyq uıymdary belsendi paıdalanýda. Keıingi 6 jylda óńirdiń 12 uıymy 70 birlik medıtsınalyq tehnıkany satyp alýǵa qarjylyq lızıng shartyna qol qoıdy.

«QazMedTeh» AQ 2010 jyly memlekettik jáne jemenshik medıtsınalyq uıymdaryn lızıng arqyly zamanaýı medıtsınalyq tehnıkamen jabdyqtaý maqsatynda qurylǵanyn esterińizge salamyz.

Medıtsınalyq tehnıkany lızıng júıesimen satyp alý - alynǵan jabdyqtardy tıimdi paıdalanýǵa jáne árbir aýrýhananyń beıinine baılanysty suranysyn qanaǵattandyrýǵa baǵyttalǵan.