Alty júz almatylyq velosherýdiń kórigin qyzdyrdy
ALMATY. QazAqparat - Almatyda «Sporttyq Almaty» baǵdarlamasy aıasynda besinshi buqaralyq velosherý ótkizildi. Saıys Halyqaralyq ishektiń qabyný aýrýlaryna qarsy kúres kúninde arnaıy uıymdastyrylyp otyr, dep habarlaıdy QazAqparat tilshisi.
Almatyda bul joly 600-ge tarta áýesqoı Ál-Farabı dańǵylynan QR Tuńǵysh Prezıdenti baǵyna deıingi 9 shaqyrymdy baǵyndyrdy.
Barlyq qatysýshylardy márede uıymdastyrýshylar tikken syılyqtar kútip turǵan edi. Syılyqtardyń arasynda velosıpedter de bolǵan. Syılyqtardyń birin velosherýge turaqty túrde qatysýshylardyń biri Anastasııa Efremenko jeńip aldy.
«Bizdiń qalada osyndaı velosherýdiń uıymdastyrylyp turatynyna qatty qýanyshtymyn. Velosıped tepkendi bala kezden unatamyn. Júldeme kóńilim tolyp tur. Uıymdastyrýshylarǵa kóp rahmet», - deıdi jeńimpaz.
Velosherý ishektiń qabyný aýrýlaryna shaldyqqan adamdardy qoldaý men olarǵa kómektesý Qoǵamdyq qorynyń, «Takeda Kazahstan» men «Alpen Farma» kompanııalarynyń qoldaýymen ótkizilip otyr.
Eske sala ketsek, «Sporttyq Almaty» baǵdarlamasy aıasynda ótkizilgen atalmysh velosherý san jaǵynan bıyl josparlanyp otyrǵan 21 saıystyń biri.
Sonymen qatar, velosherý qoǵam nazaryn qazirgi zamandaǵy ýaqtyly dıagnostıka, durys emdelý, ishektiń qabyný aýrýlaryna shaldyqqan patsıentterdiń ómir sapasyn jaqsartý máselelerine aýdartý maqsatynda ótkizilýde. Jyl saıyn álemniń 38 elinde ishektiń qabyný aýrýlaryna qarsy kúres kúni atalyp ótedi.
