Alty jasar qazaqstandyq shahmatshy Tashkentte medal aldy
TARAZ. QazAqparat - Alty jasar Bıbisara Abylaıqyzy Batys Azııa shahmat chempıonatynda elge qola medalmen oraldy. Bul týraly QazAqparat oblystyq deneshynyqtyrý jáne sport basqarmasyna silteme jasap habarlaıdy.
Vedomstvo taratqan habarlamaǵa sáıkes, shahmattan Batys Azııa chempıonaty Tashkent qalasynda ótti, oǵan 11 elden kelgen 200-den astam sportshy qatysty. Qazaqstannyń namysyn túrli jastaǵy 22 sportshy qorǵaǵan. Olardyń segizi ǵana júldeli oryn aldy.
Bıbisara Abylaıqyzy alty jasta, ol Qazaqstan quramasynda alty jasqa deıingi kategorııada rapıd jáne klassıkalyq jarysta synǵa tústi.
Aıta ketsek, Bıbisara Taraz qalasyndaǵy №2 oblystyq mamandandyrylǵan olımpıada jetkinshekterin daıarlaıtyn balalar-jasóspirimder sport mektebinde Halyqaralyq shahmat federatsııasynyń(FIDE) joǵary sanattaǵy búkilálemdik ınstrýktory Nurgúl Ilanbekovanyń jetekshiligimen daıyndalyp júr. Shahmattan basqa, qyz bala án aıtyp, júzýmen aınalysady, aǵylshyn tilin meńgerip júr.
