Alty jasar astanalyq qyz Gollıvýdty baǵyndyrdy
ASTANA. 1 maýsym. QazAqparat - Astana qalasynyń jas turǵyny bıylǵy jyldyń 22-25 mamyr aralyǵynda AQSh-tyń Kalıfornııa shtatyndaǵy Los-Andjeles qalasynda ótken «Baqytty balalyq shaq» Halyqaralyq balalar baıqaýynda birinshi oryndy ıelendi.
Jas qatysýshy Bıbimárııam Omarovanyń esimi Halyqaralyq balalar baıqaýy jeńimpazdarynyń arasynda estilgende, oǵan ózi de, mýzykalyq jetekshisi - Astana qalasynyń «Talant» óner ortalyǵynyń dırektory Marat Omarov ta senbedi, dep habarlaıdy «Báıterek» halyqaralyq medıa-orıtalyǵynan. Gollıvýdta bári sıqyrly bolyp kórinetindikten, basynda ony keremet jańalyq dep túsindi. Biraq endi kishkentaı ánshiniń bólmesinde altyn juldyz tur. Ol oǵan kez-kelgen úlken tabystyń sıqyr emes, adal eńbek pen óz kúshine senim ekenin eskertetindeı.
Qazaqstannan barǵan top sany jaǵynan eń az boldy. Bıbimárııam bul baıqaýda elimizdi jalǵyz tanystyrǵan edi. Baıqaýǵa búkil álemniń 55 eliniń ókilderi qatysty.
Baıqaý eki týrmen ótti. Birinshisinde Bıbimárııam qazaq tilindegi ándi jáne tanymal amerıkandyq ánshi Selena Gomestiń ánin oryndap, kórermender men qazylar alqasynyń qoshemetine ıe boldy. Ekinshi týrda ıspan tilindegi án oryndaldy.
Mundaı baıqaýǵa qatysý psıhologııalyq jaǵynan qandaı qıyn ekenin aıtpasa da túsinikti. Biraq, básekelestikke qaramastan, sahnanyń ar jaǵynda Bıbimárııam kóptegen ártistermen dostasty. Daıyndyq kezinde vokaldyq atalymnyń barlyq qatysýshylarynyń án aıtqany jaqsy bolǵany sonshalyq, qazaqstandyq baıqaýǵa qatysýshynyń jetekshisi jeńiske úmittenbedi. Al qyz bala bolsa amerıkandyq qazylar alqasyn óziniń tabıǵılyǵymen jáne ártistigimen baýrady.
Jas ánshiniń tabysqa jetýi kezdeısoqtyq emes. Bıbimárııam úsh jastan bastap án aıtady, «Án Orda», «Balbóbek» sııaqty kóptegen án baıqaýlarynyń jeńimpazy bolyp tabylady. Qazir Bıbimárııam «Nur Orda» halyqaralyq mektebinde bilim alýda.
Aıta keteıik, bizdiń jerlesterimiz Gollıvýdtan tek altyn juldyz ǵana alyp kelgen joq. New York Film academy dırektory Den Makler men Marat Omarov bir top qazaqstandyqtardyń amerıkandyq kınoakademııasynda bir aılyq oqytylý kelisim-shartyn jasasty. Onda qazaqstandyq azamattar úlken tájirıbe alyp, óziniń sheberligin kórsete alady, bul qazaqstandyq shoý-bıznestiń qalyptasýyndaǵy mańyzdy kezeńge aınalady.
