Alty saýsaqty 15 jastaǵy tennısshi jasóspirimder arasyndaǵy Ýımbldon synynyń ekinshi aınalymyna ótti
ASTANA. QazAqparat - Boıjetken alǵash ret Ýımbldonda óner kórsetti. Ol jasóspirimder arasyndaǵy týrnırdiń ekinshi aınalymyna ótip, jeńildi. Qazir Djons juptyq kezeńde óner kórsetýde.
Francheska Djons sırek kezdesetin aýrýmen - ektodermaldy dısplazııamen dúnıege keldi. Bul dertten zardap shegetinderde aıaq-qoldarynyń damýynda problemalar bar. Tennısshiniń oń qolynda tórt saýsaq, sol qolynda ekeý jáne uzyndyǵy kishirek taǵy eki saýsaǵy bar. Francheskanyń oń aıaǵynda úsh barmaq bar. Ýımbldon synyna deıin qyzdyń bilegine úsh ota jasalǵan.
«Derttiń meniń tennıspen shuǵyldanýyma kedergi keltirýine jol bermeımin. Kóp adam maǵan raketkany durys ustamaıtynymdy aıtady, alaıda bul sózder meni kerisinshe jigerlendire túsedi», - degen Francheskanyń sózderin keltiredi The Guardian.
Djons aǵylshyndyq Bredfordta dúnıege keldi. Balalyq shaǵynyń basym bóligin aýrýhanalarda ótkizgen. Francheska tennıspen alty jasynan bastap aınalysady.
