Alty eldiń jelaıaqtary Qaraǵandydaǵy kúzgi jartylaı marafonǵa qatysty
QARAǴANDY. QazAqparat - Qaraǵandyda alǵash ret kúzgi jartylaı marafon ótti. Kúzdik Jarty Marathon júgirisine Qazaqstan, Qyrǵyzstan, Ózbekstan, Norvegııa, Polsha jáne Reseıden kelgen 2 myńǵa jýyq adam qatysty, dep habarlaıdy QazAqparat tilshisi.
Jartylaı marafon baǵdarlamasyna úsh qashyqtyq kirdi: 21 shaqyrym 97,5 metr, 14 shaqyrym jáne 7 shaqyrym.
Shara Táýelsizdik alańynda bastaý alyp, úlken sheńberden soń qaıta sol jerde márege jetti. Qaraǵandy oblysy ákiminiń orynbasary Abzal Núkenov júgirýdiń bastalýyna belgi berdi. Máreden keıin ol 7 shaqyrym qashyqtyqtaǵy birinshi jeńimpaz atanǵan eń jyldam qyzdarǵa medaldar men gramotalardy tabys etti.
Jartylaı marafonnyń qatysýshylary trassany eńsergenshe, kórermender men qonaqtar sportshylardy tamashalaı aldy. Táýelsizdik alańynda sporttyq-kontserttik shoý uıymdastyryldy.
Erler arasyndaǵy basty jarysta qaraǵandylyq Vıacheslav Slabadenıýk jeńimpaz atandy. Ol kúzetshi bolyp jumys isteıdi, júgirý - onyń hobbıi.
«Jumystan keıin keshke júgirýge shyǵamyn. Aldymen 14-15 shaqyrymnan júgirip júrdim, qazir 30 shaqyrymdy eńseremin. Bizde júgirý áýesqoılarynyń kompanııasy bar. Onda 23-47 jas aralyǵyndaǵy alty adam jınalǵan», - deıdi Vıacheslav Slabadenıýk.
Kelesi jyldyń mamyr aıynda ol Armanga Jol jartylaı marafonyna qatysýǵa nıetti.
Áıelder arasynda basty qashyqtyqqa júgirýde birinshi bolyp márege Nur-Sultannan kelgen Ásel Quspanova jetti.
Barlyq qatysýshylar sharanyń joǵary deńgeıde uıymdastyrylǵanyn atap ótti. Aldaǵy ýaqytta kúzgi jartylaı marafon jyl saıyn ótkiziledi dep josparlanýda.
