Alty dúrkin olımpıada chempıony Ýseın Bolt Kopakabana jaǵajaıynda 100 metrlikke júgiredi
ASTANA. QazAqparat - Ataqty jelaıaq, alty dúrkin olımpıada chempıony Ýseın Bolt Rıo-de-Janeırodaǵy Kopakabana jaǵajaıynda ótetin týrnırde 100 metrlik qashyqtyqta júgiredi.
Bul týraly sportshy óziniń resmı saıtynda habarlady.
Onyń aıtýynsha, jeńil atletshi 2014 jylǵy ózi qatysatyn jarystar tizimin qurastyryp qoıǵan. 17 tamyzda Kopakabana jaǵajaıynda ótetin "Mano a Mano" týrnıri sońǵysy bolmaq. Ótken jyldyń naýryzynda, ol munda múmkindigin synap kórgen. Arnaıy salynǵan jarys jolynda 150 metr júgirgen jelaıaq jeńiske jetipti.
Tamyz aıynda Bolt taǵy úsh jarysta baǵyn synaıdy: 1-2 tamyzda Glazgo Dostastyǵynyń oıyndarynda (4h100 m estafeta), 23 tamyzda Varshavadaǵy týrnır jáne 26 tamyzda ótetin Tsıýrıhtegi jarys (ekeýi de - 100 m).
Bolt alynǵan jaraqaty saldarynan talaı jarysty ótkizip aldy, naýryz aıynan beri tolyqqandy jattyǵa da almaı júr.
Bolt - alty dúrkin olımpıada chempıony, segiz dúrkin álem chempıony. Ol 100 jáne 200 metr qashyqtyqtarda júgirýden álemdik rekordtyń ıesi. Sondaı-aq, el quramasymen birigip 4h100 m estafetasynda rekord ornatqan.
